ང་ནི་ང་སྟེ་གདོང་དམར་བོད་པའི་བུ།།
རྩམ་དྲི་ཐུལ་ལེ་སློབ་གྲྭར་འགྲོ་བའི་བུ།།
མར་ཁུ་རུས་པའི་རྐང་ལ་ཟུག་པ་ཡིས།།
ནམ་ཡང་ཞུམ་པ་མེད་པའི་དཔའ་སྤོབས་མངའ།།
ང་ནི་ང་སྟེ་གངས་ཅན་བོད་པའི་བུ།།
ཕ་དང་ཨ་ཁུའི་སེམས་ཀྱི་གཅེས་ལོ་སྟེ།།
གངས་ཀྱི་རང་བཞིན་མདོག་དང་ཡོངས་འདྲིས་ནས།།
གངས་རི་བཞིན་བརྗིད་གངས་དཀར་མདོག་དང་ལྡན།།
ང་ནི་ང་སྟེ་ཆོས་ལྡན་བོད་པའི་བུ།།
ས་དགེ་བཀའ་རྙིང་ཇོ་ནང་གཡུང་བོན་ལ།།
རིས་མེད་དད་པའི་སྤུ་ལོང་རྒྱས་བཞིན་དུ།།
ཞིང་གི་མཐུ་ལ་རྒྱབ་རྟེན་བཅོལ་བའི་མི།།
ང་ནི་ང་སྟེ་རོང་ཚ་འབྲོག་པའི་བུ།།
ཕྱི་ནང་རིག་པའི་ཉིང་བཅུད་ལ་རོལ་ནས།།
མ་འོངས་གངས་ལྗོངས་འཛུགས་བསྐྲུན་བྱ་མཁས་བུ།།
ཆོལ་གསུམ་མདོ་དབུས་ཁམས་ཀྱི་ཚབ་དང་མཚོན།།
♦གཡང་སྐྱབས་རྡོ་རྗེ།
