ངེད་གསར་འགྱུར་གྱི་གསར་བཀོད། ཉེ་སྔོན། 2018ལོའི་རྒྱལ་ཡོངས་ཀྱི་ཆོས་ལུགས་ཅུས་ཀྲང་གི་གྲོས་ཚོགས་སུ། རྒྱལ་ཁབ་མི་ཤུགས་སྤྱི་ཚོགས་འགན་ལེན་པུའུ་དང་རྒྱལ་ཁབ་ཆོས་ལུགས་ལས་དོན་ཅུས་གཉིས་ཀྱིས་མཉམ་དུ་རྒྱལ་ཡོངས་ཀྱི་ཆོས་ལུགས་ལས་དོན་མ་ལག་གི་སྔོན་ཐོན་སྡེ་ཁག32ལ་བྱ་དགའ་བསྩལ་བ་དང་། རང་ཁུལ་གྱི་མཛོད་དགེ་རྫོང་མི་རིགས་ཆོས་ལུགས་ལས་དོན་ཅུས་ལ་རྒྱལ་ཡོངས་ཀྱི་མི་རིགས་ཆོས་ལུགས་ལས་དོན་མ་ལག་གི་སྔོན་ཐོན་སྡེ་ཁག་གི་མཚན་སྙན་ཐོབ་པ་རེད། དེ་ནི་སི་ཁྲོན་ཞིང་ཆེན་ལ་མཚོན་ན་མཚན་སྙན་དེ་འདྲ་འཐོབ་མཁན་གཅིག་པུ་ཡིན།
ཉེ་བའི་ལོ་ཤས་རིང་། མཛོད་དགེ་རྫོང་མི་རིགས་ཆོས་ལུགས་ཅུས་ཀྱིས་རྫོང་ཨུ་དང་རྫོང་སྲིད་གཞུང་གིས་ལས་དོན་གཙོ་བོར་དམིགས་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རབ་དང་རིམ་པའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་ལེན་བྱས་ཤིང་། ཏང་གི་ཆོས་ལུགས་ལས་དོན་གྱི་བྱེད་ཕྱོགས་དོན་འཁྱོལ་བྱས་ནས། ཆོས་ལུགས་ལས་དོན་གྱི་དོ་དམ་དང་དགོན་པ་དོ་དམ་ལ་ཤུགས་བསྣན་པ། དགོན་ཁག་གི་རྨང་གཞིའི་སྒྲིག་བཀོད་ཆ་རྐྱེན་ཇེ་ལེགས་སུ་བཏང་ནས་ཆོས་ལུགས་པ་རྣམས་ལ་སྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་ལོངས་སུ་སྤྱོད་དུ་བཅུག་ཅིང་། རྫོང་ཡོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས། ཆོས་ལུགས་འཆམ་མཐུན། སྤྱི་ཚོགས་བརྟན་བརླིང་བཅས་ལ་སྐུལ་འདེད་བཏང་།
རྫོང་རིམ་འགོ་ཁྲིད་དང་རྫོང་རིམ་ལས་ཁུངས་ཀྱིས་དགོན་པ་དང་ཆོས་ལུགས་པའི་འཐུས་མིར་འབྲེལ་བ་འཛུགས་པའི་ལམ་ལུགས་ལག་ཏུ་བསྟར་ནས། དགོན་པ་དང་མང་ཚོགས་ལས་དོན་རྒྱུན་སྲོལ་ཅན་དུ་བསྒྱུར་བ་རེད།
མཛོད་དགེ་རྫོང་གིས་ལམ་ལུགས་རབ་དང་རིམ་པ་བཟོས་ཏེ། རྫོང་ཨུའི་ཧྲུའུ་ཅི་དང་རྫོང་དཔོན། རྫོང་རིམ་ལས་ཁུངས། ཡུལ་ཚོ་དང་གྲོང་རྡལ་སོ་སོ་བཅས་ཀྱི་འགོ་ཁྲིད་གཙོ་བོས་དགོན་པ་དོ་དམ་སོགས་ལས་ཀ་བསྒྲུབས་ཚུལ་ཞིབ་བཤད་བྱས་ཤིང་། དགོན་པའི་དམངས་གཙོའི་དོ་དམ་ཐད། མཛོད་དགེ་རྫོང་ལྷ་མོ་དགོན་པས་བཏོན་པའི་མི་རུང་བ་གསུམ་གྱི་དམ་བཅའ་ལ་རྫོང་ཨུ་དང་རྫོང་སྲིད་གཞུང་གིས་རྒྱབ་སྐྱོར་བྱས་ཏེ། བོད་བརྒྱུད་ནང་བསྟན་དགོན་པའི་ཁྲིམས་བརྟེན་དོ་དམ་དང་དམངས་གཙོ་དོ་དམ། སྤྱི་ཚོགས་དོ་དམ་བཅས་མཉམ་དུ་འབྲེལ་བའི་དོ་དམ་མ་ལག་འཐུས་ཚང་དུ་བཏང་་ནས། དམངས་གཙོ་དོ་དམ་གྱི་ནུས་པ་དང་ཆུ་ཚད་ཇེ་མཐོར་བཏང་བ་རེད།
རྒྱུས་ལོན་པ་ལྟར་ན། མཛོད་དགེ་རྫོང་གིས་སྒོར་ཁྲི3000ལྷག་རྫོང་ཡོངས་ཀྱི་དགོན་པ་དག་གི་ཆུ་དང་གློག ལམ་སོགས་རྨང་གཞིའི་སྒྲིག་བཀོད་འཛུགས་སྐྲུན་ལ་བཏང་ནས། སྔ་གཞུག་ཏུ་དགོན་པའི་སྤྱི་སྤྱོད་ཁང་བ109དང་གྲྭ་ཁང533གྱི་གློག་སྐུད་ལེགས་བཅོས། དགོན་པ30ཡི་སྤྱི་སྤྱོད་ཆབ་ཁང་། དགོན་པའི་མེ་འགོག་རྫིང་བུ། དམངས་གཙོ་དོ་དམ་ཁང་གི་གཞུང་སྤྱོད་ཁང་བ་སོགས་འཛུགས་སྐྲུན་བྱས་ཏེ། དགོན་པ་དག་གི་རྨང་གཞིའི་སྒྲིག་བཀོད་ཆ་རྐྱེན་དང་ཞབས་ཞུའི་ཆུ་ཚད་ཇེ་མཐོར་བཏང་ཡོད། རྣམ་གསར་ཞིང་གྲོང་གི་རྒན་གསོའི་འགན་བཅོལ་དུ་གྲྭ་བཙུན1135བཅུག་པ་དང་། གྲྭ་བཙུན80འགན་སྲུང་ལྔའི་གསོ་སྐྱོང་དུ་བཅུག་པ། གྲྭ་བཙུན111གིས་རྒན་གསོའི་ཐོབ་ཐང་ལོངས་སུ་སྤྱོད་བཞིན་ཡོད། རྫོང་ཁོངས་ཀྱི་དགོན་པ་དག་ལ་རྒྱང་སྒྲོག་བརྙན་འཕྲིན་འཕྲོད་པར་བྱས་ཡོད།
(གསར་འགོད་པ་མགོན་པོ་ཚེ་བརྟན།)
