ཁེར་རྐྱང་།
དགུན་ཁ་ཚེས་མ་ཐག
འདབ་ཆགས་དག་ཚང་མལ་དུ་ལོག་རྗེས།
བར་སྣང་དང་གཙང་བོ་ཁེར་རྐྱང་དུ་གྱུར།
སྨྲ་བ་ཉུང་དུ་ཕྱིན།
རང་ཉིད་གཅེས་མེད་པའི་སྙན་ངག་པ་དེ་དག
ངའི་གྲིབ་མའི་ནང་དུ་ལོག་ནས་རབ་ཏུ་ངུས།
དེ་ཡི་རྗེས་ནས།
ང་རང་སྨྲ་བ་ཉུང་དུ་ཕྱིན།
ཁྱོད་ཀྱིས།
ཡིད་གདུང་གི་ཐལ་བའི་ནང་དུ།
ཁྱོད་ཀྱིས་ལག་པ་གཉིས་པོ་སྤྱད་ནས།
གཞན་གྱིས་རེག་མི་ཐུབ་པའི།
བརྩེ་དུངས་བྲིས།
བར་ཐག
བར་ཐག་ནི་འགོག་ཐུབ་པ་ཞིག་མིན་པས།
སྨག་རུམ་བཞིན་སྔ་གཞུག་བྱས་ཏེ།
ཚུར་ལ་ཚེས་ཡོང་བ་ཞིག་ཡིན།
སེམས་ཁྲལ།
ཅི་ཞིག་འབྲི་སྙིང་འདོད་ལ།
གང་ཡང་བྲི་བར་མི་ནུས་པས་དུས་ཚིགས།
ཚོར་བ་འགག་པའི་ཟླ་བ་བཅུ་གཉིས།
ང་ཡི་མིག་མདུན་དུ་ལུས་པའི་ཁྱོད་ཀྱི་བྱད་གཟུགས།
སྙན་ངག
སྙན་ངག་འབྲི་བར་དཀའ་བའི་ལག་པ་འཁྱག་པོ།
སུ་ཞིག་གིས་ཡོངས་སུ་བཅད་སོང་།
རྒྱང་རིང་ལྟ་བྱེད་ཀྱི་མིག་ཟུང་གཉིས།
རེག་པར་དཀའ་བའི་སྐྲ་ལོ་དེས་བསྒྲིབས་སོང་།
ཅི་ཡང་མི་ཐེག་པའི་སེམས་སྙི་མོ།
རླུང་ནང་གི་སྐད་ཆ་དེས་བྲེགས་སོང་།
ཆར་བ།
རྒྱུན་ཆད་མེད་པར་འཇིག་རྟེན་གྱི་གཅོང་རོང་དུ།
ཆར་འབྲི་རེ་རེར་ན་ཟུག་གིས་མར་ལྷུང་།
སྣང་ལ་མ་ངེས་པའི་བདེ་སྡུག་དག
ན་ཚོད་མ་སྨིན་པའི་བརྩེ་དུངས།
སྡུག་བསྔལ་གྱི་རྗེས་སུ་འཁྲིད།
ནམ་ཟླ་འཁྱག་ཚུལ་དང་འདྲ་བར།
ནང་སེམས་ཀྱང་མེ་འཁྱག་པ་ཞིག་དང་མཚུངས།
དྲི་བ།
མ་སྐྱེས་པ་མཐའ་དག་སྐྱེས་པར་གྱུར་སོང་ན།
ཚེ་སྲོག་དེ་དག་མེ་ཏོག་བཞད་བཞད་བྱས་ཏེ།
འཐབ་འཛིང་དག་རང་བཞིན་གྱིས་ཞི་མི་འགྲོ་འམ།
ཡོད་པ་མཐའ་དག་མེད་པར་གྱུར་སོང་ན།
སྟོང་པ་ཉིད་ཟེར་བའི་བརྡ་ཆད་དེ།
བཞག་པ་ལ་དགོས་མེད་དུ་གྱུར་སོང་བ་མིན་ནམ།
གྲོགས་པོ།
ཁྱོད་ཀྱི་ཕྲ་ཕུང་ནང་གི།
ཁེར་རྐྱང་གི་གྲིབ་གཟུགས་ཕྱིར་ལྡོག་མི་ནུས་ན་ཡང་།
ཁྱོད་ཀྱིས་སྔར་བཞིན་ཨུ་ཚུགས་བྱས་ཏེ།
རང་ཉིད་ཀྱི་གྲིབ་མ་མི་ཚོགས་ཁྲོད་གཡུགས་དོན་ཅི།
ཁྱོད།
ཁྱོད་ཀྱིས་ང་མཐོང་མི་འདོད་ན།
ཁྱོད་ང་དང་བྲལ་བ་ཧ་ཅང་སླ་མོ་ཞིག་ཡིན།
མེ་འཁོར་ནང་ལ་བསྡད་རྗེས་མིག་མདུན་གྱི།
ཡུལ་དངོས་མཐའ་དག་ཡལ་འགྲོ་བ་དེ་ཙམ་རེད།།