མ་བྲིས་རང་བྱུང་གི་ཆོས་ཉིད་ཁྲ་ཁྲ།།
བྲིས་ཀྱང་མ་ངེས་པའི་འཁོར་བའི་སྐྱིད་སྡུག།
ལས་ཀྱིས་དེད་པ་ཞིག་མིན་མིན་བཤད་ཀྱང་།།
སེམས་པའི་རི་ལུང་ན་ལྷང་ངེར་ཤར་ཡོད།།
འདི་ནས་མགོ་ཐོག་ནམ་མཁའ་ལ་བལྟས་ཏེ།།
སྤྲིན་པ་དམ་དུམ་ཞིག་བཤར་བའི་ཚུལ་ལ།།
དྲན་པའི་གཞས་ཆུང་དེ་ལེན་དགོས་བསམས་ཀྱང་།།
མགྲིན་པའི་འགྱུར་དབྱངས་ཀྱི་རྟ་ལ་མ་ཁུག།
ལོ་ཟླའི་ཨ་ལོང་ལ་གོར་སེར་སྐོན་པའི།།
དུས་ཚིགས་དེ་དག་ནི་ཇི་འདྲའི་མཛེས་པ།།
དེ་དུས་འུ་གཉིས་ཀ་ཆ་མེད་ཡིན་ཡང་།།
ཡིད་ཞེའི་འཕལ་ཀ་ནི་ངང་གིས་འཕྲོད་ཡོད།།
སེམས་སོང་ཕྲ་མོ་འདིའི་རྗེས་སུ་སྙེགས་ཏེ།།
ངལ་བས་རི་ཆུ་ནི་བརྒལ་བར་སྤོབས་ཀྱང་།།
སྐྱོ་བ་རླུང་ཆེན་གྱི་སྤུ་གྲི་རྣོན་པོས།།
གོམ་པའི་འདེག་འགྱོག་འདི་བསྒྱུར་ཐབས་མ་བྱུང་།།
ཚེ་ལོ་དཀར་ནག་གི་སྣང་བའི་མཐའ་རུ།།
མི་འདོད་རླུང་བུ་ནི་ལྡང་དགོས་མ་གསུངས།།
ཡ་ཆུང་ནང་དབུས་ཀྱི་སྙིང་ཐུབ་འདི་གོ།
བསྐལ་བརྒྱར་གནས་གཏན་གྱི་ཡིད་བཞིན་ནོར་ཡིན།།
འཁོར་བའི་ལ་རིང་དང་ལ་ཐུང་བརྒལ་ཏེ།།
འཇིག་རྟེན་སྣ་ཚོགས་ཀྱི་འཐབ་རར་ལྷུང་དུས།།
ང་རས་སྐྱོར་མ་ཞིག་ཏན་ཏན་མེད་ཀྱང་།།
ཅི་སྐྱོ་འུ་ཅག་ནི་འཁོར་བའི་མྱི་ཡིན།།
མྱི་ཁའི་ཚེར་ལམ་ཞིག་ཧོབ་ཀྱིས་གཤགས་ཏེ།།
རང་སྣང་ཡང་དག་ཅེས་ཞུ་དགོས་མེད་ཀྱང་།།
ལོ་བརྒྱའི་ལན་ཚིགས་ཀྱི་ཁ་དན་འདི་ག།
རང་གི་དད་འདུན་གྱི་དཀོན་མཆོག་དངོས་ཡིན།།
སྐྱེས་དམན་བཟང་ངན་གྱི་ཆོ་ག་མེད་ལ།།
དབང་ཐང་ལོངས་སྤྱོད་ཀྱི་གོ་རིམ་མེད་པར།།
འདང་བརྩེའི་འཕྲོད་སྦྱོར་ལ་ལྷག་པར་ཆགས་པའི།།
ཁྱིམ་དང་གཞི་མ་ཁྱོད་དམར་ཆུང་སྙིང་རེད།།
