སྣུམ་ཚོན་རི་མོ་འདིའི་མིང་ལ་ཕྱི་ཡིག་གིསThe Starry Nightདང་། རྒྱ་ཡིག་གིས星月夜ཟེར་ཏེ། རྒྱལ་ཁོངས་ཧི་ལན་ནས་ཡིན་པའི་ཧྥན་ཀོ་ལགས་ཀྱི་བརྩམས་ཆོས་རྩེ་གྲས་ཤིག་ཀྱང་ཡིན་སྐད། ཡིག་ཚགས་ལྟར་ན། སྤྱི་ལོ1889ལོར་བྲིས། ཆེ་ཆུང་ལ73.0x92.0cmརྐྱང་རྐྱང་ཡོད། ད་ལྟ་ཉིག་ཡོའུ་ཡི་དེང་རབས་སྒྱུ་རྩལ་དངོས་མང་བཤམས་སྟོན་ཁང་དུ་ཉར་ཡོད། རི་མོ་འདིའི་མཚོན་དོན་གཙོ་བོ་འཆད་སྐབས“བྲེལ་ཟིང་གི་བརྩེ་དུང་དང་མགོ་འཁོར་བློ་ཁམས་ཀྱི་འཇིག་རྟེན”ཞེས་སུ་བྲིས་ཡོད།

ང་ལའང་རི་མོ་འདི་དང་ཁ་ཐག་དེ་ཙམ་མི་རིང་བའི་འཆར་སྒོ་ཞིག་བརྡོལ་མྱོང་བ་དེ་ལུགས་འབྱུང་དང་ལུགས་ལྡོག་འདྲེས་མས་རན་ཙམ་བྲིས་ན་གཤམ་གྱི་འདི་འདྲའོ།།

ང་རང་ད་ལྟ་ཟི་ལིང་ནས་ལྷ་སར་འཕུར་བའི་གནམ་གྲུ་ཞིག་ཏུ་བསྡད་ཡོད་ལ། མདང་ནུབ་ཀྱང་གཉིད་ཀྱིས་མ་འདང་བས་མགོ་བོ་ལྕི་ཞིང་ཚིག་པ་ཟ་བ་ཞིག་རེད། འོན་ཀྱང་ངའི་ཡིད་དུ་གསལ་བོར་འཆར་བ་ནི་ཁོ་བོ་གནམ་གྲུའི་སྒོ་མོ་རུ་འཛུལ་ཁ་མ་ཏག་ཏག་ལ་སྒོ་གཞན་ཞིག་ཏུ་མཐོང་མྱོང་འདྲ་བའི་རྒྱབ་གཟུགས་ཤིག་ཐོལ་གྱིས་སྣང་སོང་།

རྒྱུས་ཡོད་ཀྱི་ཕྲག་པ། ཆ་མེད་ཀྱི་སྒལ་གཞུང་། སྐྲ་ལོའི་རྦབ་ཆུའི་རྦབ་ཆུ་ཨང་། ཁོ་མོ་ཡང་སྙིང་སུ་ཞིག་ཡིན་ནམ།

གནམ་གྲུས་སྤྲིན་རིམ་བརྟོལ་བའི་རྒྱུན་དང་བསྡེབས་ནས་ངས་སྐར་ཚོགས་ཀྱི་འཇིག་རྟེན་ཞིག་ལ་བསམ་བློ་གཏོང་དགོས་བྱུང་། ངའི་སྣང་བ་ཞིག་ལ་གནམ་གྲུས་རླུང་ཡར་གཅོད་མར་གཅོད་དང་སྤྲིན་གཡས་བསྐྱུར་གཡོན་བསྐྱུར་གྱིས་འཕུར་གྱིན་ཡོད་པ་འདྲ། སྣང་བ་ཙམ་ལས་དོན་གྱིས་དེ་ལྟར་འཕུར་གྱིན་མེད་ཀྱང་སྲིད་དེ། དཔེར་ན། ཧྥན་ཀོའི་རི་མོའི་ཚོས་ཁར་ལས་སླ་པོས་གླགས་མི་འཁེལ་བ་ནང་བཞིན།

ཡང་ངའི་སྣང་བ་ཞིག་ལ་ང་རང་ངམ་ང་རང་བསྡད་ཡོད་སའི་གནམ་གྲུ་འདི་སྐར་མ་ཞིག་དང་ཐག་ཇེ་ཉེ་ཡིན་པ་འདྲ་སྟེ། ལས་ཀྱིས་འབྲེལ་བའི་སྐར་མ་ཞིག་ཨང་། ཡང་ན་སྐར་མ་དང་འདྲ་བ་ཞིག་ཨང་། འཁྱགས་ལ་མཁྲེགས་པའི་སྐར་མ་ཞིག་གི་སྟེང་དུ། ཁོ་མོ་འདར་ལྕུག་ལྕུག་གིས་བསྒོངས་ཡོད་པ་འདྲ། འོ་ན་ཁོ་མོ་ཅིའི་ཕྱིར་སྐར་མ་ཞིག་གི་སྟེང་དུ་འཁྱགས་བསྒོངས་ཀྱིས་འདུག་དགོས་སོང་བ་རེད་དམ། དེ་རང་ཧྥན་ཀོའི་རི་མོ་ལ་འབྲེལ་བ་མེད་ཀྱང་སྲིད་དོ།།

ང་ལ་འཆར་སྒོ་འདི་འདྲ་ཞིག་བྱུང་ནས་དུས་ཡུན་ཧ་ཅང་རིང་པོ་སོང་མོད། མུག་ལས་སྡུག་ལས་ཀྱིས་མནན་དྲགས་ནས་སམ་གང་ལྟར་འཆར་སྒོ་དེ་དངོས་སུ་ཡི་གེར་ཕབ་རྒྱུ་ནི་བྱུང་མ་སོང་། ཡིན་ནའང་འདི་ལྟར་ས་རུབ་ཐེངས་རེ་རེར་འཆར་སྒོ་དེ་འཇགས་པ་མེད་པར་ངའི་ཀླད་པའམ་བསམ་པའི་གཞི་དཀྱིལ་དུ་ཡང་ཡང་གདུ་ཞིང་ཡང་ཡང་འཕྱོའོ།། དཔེར་ན་དོ་དགོང་ནང་བཞིན། དཔེར་ན། ཧྥན་ཀོའི་རི་མོ་ནང་བཞིན།

འཆར་སྒོ་འདི་སྔོན་ཆད་ཡི་གེར་གཏན་ནས་ཕབ་མ་མྱོང་ཟེར་ནའང་མི་འགྲིག་སྟེ། སྙན་ཚིག་གི་ལམ་ནས་ནི་བྲིས་མྱོང་མོད། དེ་ནི་རང་གིས་གོ་བ་མ་གཏོགས་གཞན་ཚང་མས་གོ་བ་ཞིག་ཡིན་རྒྱུ་མ་རེད་སྙམ་པའི་སེམས་ཁྲལ་ཞིག་རྟག་པར་འབྱུང་ངོ་།། ཧྥན་ཀོའི་རི་མོ་གོ་དཀའ་བ་ནི་འདི་ལ་བསྡུར་རུང་མི་རུང་ངས་ཀྱང་མི་ཤེས།

ངའི་སྙན་ཚིག་དེའི་ཁ་བྱང་ལའང《ནམ་མཁར་རྒྱུ་བའི་སྙིང་སྡུག་མ》ཞེས་ཟེར། ང་ལ་བསམ་པ་འདི་འདྲ་ཞིག་ག་རེ་བྱས་བྱུང་ངམ་ཟེར་ན་ནི། ལན་ཡང་དག་ཅིག་མེད་དེ། མི་ལ་བླ་སྐར་ཟེར་བ་ཞིག་ཡོད་ལུགས་དང་། མི་རེ་ཤི་དུས་སྐར་མདའ་རེ་ལྷུང་འགྲོ་ཟེར་བའི་བག་ཆགས་དེས་སམ། ཡང་ན་ཚན་རིག་རྟོག་སྒྲུང་གི་གློག་བརྙན་དག་གིས་བཞག་པའི་ཤུགས་རྐྱེན་གང་ཡིན་མི་ཤེས་ཤིང་། དེ་ལས་གཞན་ཞིག་ཡིན་ནའང་ཐང་སྟེ་འཆར་སྒོ་ལ་ལ་ཞིག་ནི་འཆར་སྒོ་ཙམ་ཞིག་ཡིན་མིན་ཡང་ཧ་ཅང་ལབ་དཀའ།།

ཁོ་མོས་ལོ་ལྔ་བརྒྱ། ཡང་ན་ལོ་ཁྲི་གཅིག ཡང་ན་ལོ་དུང་ཕྱུར་གྱི་རིང་ཞིག་ལ་ནམ་མཁའི་སྐར་མ་རེ་རེའི་ཐོག་ནས་ས་སྟེང་གི་ང་ལ་ལྟ་བཞིན་ཡོད་ཟེར་ན་ཁྱོད་ཚོའི་རྣར་མི་འགྲོ་ལས་ཆེ་སྟེ། སྤྱིར་བཏང་ངའི་རྣར་ཡང་འགྲོ་དཀའ་ཙམ་འདུག་མོད། སྐབས་དང་སྐབས་སུ་རྣར་མི་འགྲོ་བའི་རང་དབང་ཁྱོན་ནས་མེད་དེ། སྔོ་ནག་གི་ནམ་མཁའི་མུ་ཁྱུད་ནས། འདར་འདར་རྒྱུ་བའི་སྐར་མ་དེ་ཚོ་མཐོང་ཐེངས་རེར་ངའི་སེམས་པ་ཧ་ཅང་སྐྱོ་བས་མནར་འགྲོ་བ་འདི་ཅིས་ཡིན་ནམ། དྲན་གདུང་གི་ལས་ལ་ཚོད་ཀྱང་མེད་ལ་གྲངས་ཀྱང་མེད་པ་འདི་ཡང་ཅིས་ཡིན་ནམ།

བསམས་ཤིང་བསམ་ན། ཁོ་མོ་ཁ་ཆད་ཅིག་གི་ཆེད་དུའམ་དམ་བཅའ་ཞིག་གི་ཕྱིར་དུ། མུ་ནས་མུར་སྐར་མ་གང་རུང་དུ་གནས་སྤོར་བཞིན་ཡོད་ངེས་ཞེས་དང་། ཁོ་མོས་སྤྲིན་པའི་རྔམས་ཀ་བརྒྱུད་ནས་ས་སྟེང་གི་ང་དང་ངའི་ཁང་ཆུང་མིག་གིས་འཚོ་བཞིན་ཡོད་ངེས་ཞེས་པའི་ཁུངས་ལུང་མེད་པའི་གདེང་ཚོད་ཅིག་ཀྱང་རྙེད་རྒྱུ་འདུག ཧྥན་ཀོས་ཀྱང་ཁུངས་ལུང་དེ་འདྲར་བརྟེན་མེད་པའི་ངེས་པ་མི་འདུག་ཨང་། ངའི་ཁོ་མོ་ཞེས་པ་དེ་གསོན་པོ་ཞིག་ཡིན་ནམ་ཤི་བོ་ཞིག་ཡིན། རྣམ་ཤེས་ཤིག་ཡིན་ནམ་ཅི་ཞིག་ཡིན་ཞེས་འདྲི་བའི་དབང་དུ་བཏང་ནའང་ང་ལ་ལན་ཆ་ཚང་ཞིག་གདབ་རྒྱུ་དངོས་གནས་མི་འདུག་ལགས།

ཡིན་ནའང་མཚན་མོ་བསླེབས་ཐེངས་རེ་རེེར་ངས་རང་གི་ཁང་མིག་གི་གློག་འོད་ལ་ནམ་མཁའི་སྐར་མའི་སྟེང་ནས་བལྟས་ན་གསལ་ཚད་ག་ཙམ་ཡོད་མེད་དང་། ས་སྟེང་གི་སྒེའུ་ཁུང་ཚང་མའི་ཁྲོད་དུ་ངའི་ཁང་མིག་གི་སྒེའུ་ཁུང་འདི་ཁོ་མོ་ཞེས་པ་ཞིག་གིས་ངོས་འཛིན་བྱ་ཐུབ་མིན་བཅས་ལ་སེམས་ཁྲལ་བསྟུད་མར་བྱེད་ཀྱིན་ཡོད།

སྐྱེ་བོ་གཞན་དག་གིས་མཁའ་འགྲུལ་བྱེད་པ་ལ་དོན་དག་ཁ་གསལ་འདི་དང་དེའི་ཆེད་དུ་ཡིན་ཞེས་བརྗོད་རྒྱུ་ཞིག་ཡོད་སྲིད་ཀྱང་། ང་ལ་ནི་དེ་འདྲའི་དམིགས་ཡུལ་མཐར་ཐུག་པ་ཞིག་གཏན་ནས་མེད་ཅིང་། ངས་མཚན་མོར་མཁའ་འགྲུལ་བྱེད་པའང་སྐར་མ་ཞིག་ལ་ཐག་ཇེ་ཉེར་གཏོང་བའམ་སྐར་མ་ཞིག་ཅུང་གསལ་བོར་མཐོང་རྒྱུའི་དོན་ཁོ་ན་ལྟ་བུའི་ཅིས་ཀྱང་བཤད་ས་མི་རྙེད་པ་ཞིག་གོ།།འོན་ཀྱང་ཧྥན་ཀོར་བཤད་ས་འགྲོན་ཡང་ཐང་།

མཚན་མོ་ཞིག་ནས་བཟུང་སྟེ་ཁོ་མོས་ངའི་སྒེའུ་ཁུང་གི་འོད་སྣང་མཐོང་མི་སྲིད་པ་ཡིན་ཏེ། དུས་ཚོད་དེ་ནམ་ཞིག་ཡིན་ཟེར་ན། ང་རང་ཚེ་ལོ་མཐར་ཕྱིན་ནས་སྐར་མ་བྱས་ཟིན་ཁར་མི་ཚོས་སྐར་ཐུག་ཀྱང་འཐུངས་ཟིན་པ་དེ་མ་ཐག་གི་སྐབས། ང་རང་ཧྥན་ཀོའི་རི་མོ་ལྟ་བུའི་འཇིག་རྟེན་དེར་ལོག་ཟིན་པ་དེ་མ་ཐག་གི་སྐབས་སོ།།

དུས་དེ་ནས་བཟུང་སྟེ་ཁོ་མོ་ཡང་མཁའ་དབྱིངས་སྐར་མའི་འཇིག་རྟེན་ནས་གཏན་དུ་ཡལ་འགྲོ་ཡང་སྲིད་ལ། ད་དུང་ཡང་འདར་འདར་རྒྱུ་བའི་འོད་ཆུང་གཞན་ཞིག་གིས་མུ་མཐུད་གནས་དགོས་ཀྱང་ཅི་ཆ་སྟེ། རིགས་པ་ལས་བརྒལ་བ་འདི་དག་ཅིས་ཀྱང་མི་འཚལ།

ངས་རྩོམ་འདི་བློས་བསླངས་བྱས་ཚར་དུས་གནམ་གྲུས་ལྷ་སའི་བར་སྣང་གཤགས་ཏེ་སར་འབབ་ལ་ཉེའོ།། མི་འགྱང་བར་ངས་ལྷ་སའི་ནམ་མཁའ་ལ་བལྟ་ཆོག་ཅིང་། ཧྥན་ཀོའི་ནམ་མཁའ་ལའང་བལྟ་ཆོག

གང་ལྟར་ངས་སྔོ་མདོག་གི་འཇིངས་སུ་བསྔལ་བའི་སྐར་མ་ཞིག་དང་། དེ་དང་ལས་སྐལ་གཅིག་པའི་ས་སྟེང་གི་འདུ་ཤེས་དང་འདུ་བྱེད་ཀྱི་གར་སྟབས་འགའ་ཞིག་ཅི་མི་སྙམ་པར་བཤམས་པ་འདི་ལ། ཧྥན་ཀོའི་རི་མོ་དང་སྦྲགས་ཏེ་འཕགས་པ་རྡོ་རྗེ་གཅོད་པའི་ཆོས་སྐད་ཅིག་གིས་ལམ་འཇུག་བྱས་ནའང་འཐད་སྙམ་སྟེ། སྐར་མ་རབ་རིབ་མར་མེ་དང་།། སྒྱུ་མ་ཟིལ་བ་ཆུ་བུར་དང་།། རྨི་ལམ་གློག་དང་སྤྲིན་ལྟ་བུར།། འདུས་བྱས་ཐམས་ཅད་དེ་ལྟར་ལྟ།། ཞེས་ཀྱང་དབྱངས་སུ་འཐེན་པར་བྱའོ།།