ཤེལ་དཀར་ལྷུན་པོའི་ཕྲེང་བས་ཡོངས་བསྐོར་བ།།
དགེ་མཚན་དཔལ་གྱིས་མངོན་མཐོ་སཱ་ལའི་ལྗོངས།།
རང་བྱུང་སྣོད་ཀྱི་མཛེས་པའི་མཚར་སྡུག་དཔལ།།
འཆི་མེད་གནས་ལས་དཔེ་ཟླ་དམིགས་སུ་མེད།།
རབ་འབྱམས་ཕྱོགས་བཅུའི་ཞིང་ན་ཐུབ་རྣམས་ཀྱིས།།
ལན་གཅིག་ཙམ་མིན་བསྔགས་པས་སེམས་དཔའ་ཆེ།།
པད་དཀར་འཛིན་པའི་ཐུགས་རྗེའི་འོད་ཞགས་ཀྱིས།།
རིང་ནས་བསྐྱངས་པས་གྲགས་པའི་རྣ་རྒྱན་དཔྱངས།།
གཙུག་ལག་ཉི་ཟླ་ཟུང་གི་དཀྱིལ་འཁོར་མཆོག།
དྲན་དབང་འབུམ་གྱིས་ངལ་བརྒྱའི་དཔུང་བ་ཡིས།།
གདོང་དམར་སྐྱེ་དགུའི་མགྲོན་དུ་ལེགས་དྲངས་པས།།
རིག་པའི་གཟི་དཔལ་བསྐལ་བའི་མཐར་ཡང་བཀྲ།།
འཇིག་རྟེན་དབང་ཕྱུག་བྱིན་རླབས་སྦྲང་རྩིའི་རོ།།
སྙིང་གི་ཡོལ་ཀོར་ཆགས་པ་སྤྲེལ་སྒོམ་པ།།
སེམས་དཔའ་གང་གིས་རྒྱལ་ཡུམ་སྒྲོལ་མའི་འཕྲུལ།།
བྲག་སྲིན་ཁབ་ཏུ་བཞེས་པའི་ལྷུམས་རྒྱ་ལས།།
རིགས་ཀྱི་མྱུ་གུ་རྣམ་པར་གྲོལ་བ་ནི།།
མུ་ཏིག་དོ་ཤལ་བསྟར་ལ་བརྒྱུས་པ་བཞིན།།
མི་བུ་གདོང་དྲུག་ཅེས་སུ་གྲགས་པའི་གཏམ།།
དབྱར་ཀྱི་འབྲུག་སྒྲའི་སྐད་ལ་རྣམ་པར་འཁུ།།
རིགས་གསུམ་སེམས་དཔའི་སྣ་ཚོགས་ཟློས་གར་གྱིས།།
ལུགས་གཉིས་འཕྲིན་ལས་སྤེལ་བའི་ཐབས་ཚུལ་ཅན།།
མེས་དབོན་གསུམ་སོགས་ས་སྐྱོང་བཙན་པོའི་གདུང་།།
མི་རྗེ་ལྷ་ཡིས་མཛད་པའི་ངོ་མཚར་འབར།།
སུམ་གཉིས་གསེར་ལྡན་འཛིན་མའི་དཀྱིལ་འཁོར་ཁྱོན།།
འབུམ་ཕྲག་དཔུང་གིས་རུ་མཚོན་གཟེངས་དང་ལྷན།།
དྲེག་ལྡན་རལ་པའི་གདེངས་ཀ་བསྙིལ་པའི་གཏམ།།
ལོ་རྒྱུས་གླེགས་བམ་གསེབ་ན་འོད་དུ་འཚེར།།
ཆེ་མཐོ་གོ་ལའི་ཏོག་ཏུ་མངོན་འཕགས་པའི།།
ས་མཐོའི་སྣོད་བཅུད་མཛེས་པའི་ཡོན་ཏན་ནི།།
མཐའ་བྲལ་ཀུན་གསལ་ཡངས་པའི་རྒྱ་ཁྱོན་དང་།།
རྣམ་ཀུན་མཚུངས་ཞེས་བདག་གིས་བརྗོད་པར་འདོད།།