ལི་ཐང་བྱམས་ཆེན་ཆོས་འཁོར།།
ཕྱོགས་ལས་རྣམ་རྒྱལ་ཡིན་སོང་།།
རྒྱལ་དབང་སྐུ་ཕྲེང་གསུམ་པའི།།
བློ་དང་བཀོད་པ་མཚར་བ།།
ལི་ཆུའི་སྟོད་དུ་འཁྲུངས་པའི།།
ལི་ཐང་ཐང་ཆེན་མཛེས་པ།།
ལི་ཡི་མེ་ལོང་རང་བྱོན།།
བྱོན་པ་དེ་དང་འདྲ་བྱུང་།།
སྐེད་ཆབ་གསེར་ཆབ་དངུལ་ཆབ།།
ཆབ་རྒྱུན་ཆབ་མགོར་འཁྱུད་ཡོད།།
ཆབ་རྒྱུན་དམ་ལྷོད་རན་པ།།
ཆབ་མགོ་བསམས་པ་ལོས་ཡིན།།
འཛབ་ལ་གསེར་འཛབ་དངུལ་འཛབ།།
བྱུ་རུའི་རྒྱན་དུ་འཁྲུངས་ཡོད།།
བྱམས་པས་གནང་བའི་དངུལ་འཛབ།།
གསེར་ལས་འདང་རྩིས་ཆེ་བ།།
དངུལ་གྱི་གློ་ཟུངས་སྟེང་དུ།།
བྱུ་རུས་ཕྲ་རྒྱན་བཏབ་ཀྱང་།།
ནོར་འཛིན་པ་ཏྲ་མེད་ན།།
རྒྱན་དུ་བརྩི་སྙིང་མི་འདུག།
བྱ་འབྲུག་ཁ་སྤྲོད་རི་མོ།།
བྱང་གདན་སྟེང་དུ་འཁོད་འཁོད།།
སེམས་པའི་ཉིན་སྲིབ་གཉིས་སུ།།
བྱམས་པའི་འཛུམ་རིས་འཁོར་ཡོད།།
རྟ་སྒ་སྦལ་སྒ་ཐོད་ལེབ།།
འཇའ་འགྲིགས་མཐའ་རྒྱན་སྤྲོས་ཀྱང་།།
རྟ་ཕོས་བྱང་ལམ་གཅོད་དུས།།
རྟ་སྒ་གཡུགས་གྲབས་མཛད་བྱུང་།།
རྫ་རིའི་རྫ་ཆུ་བསིལ་མ།།
ཆུ་ཟོམ་ཁ་རུ་ལྡེམ་ལྡེམ།།
ན་ཆུང་བུ་མོའི་མིག་ཟུང་།།
ལན་བུའི་འོག་ན་ཀེམ་ཀེམ།།
དཀར་སངས་འབྲུག་གཉིས་ཤིག་ལ།།
དངུལ་གྱི་རྐུབ་ཤན་བརྒྱབ་ཡོད།།
ཆུང་འདྲིས་ལོག་ཡོང་དུས་ལ།།
གསོལ་སྐྱེམས་དྲངས་ན་བསམས་ཡོད།།
ཞྭ་མོ་ཚེ་རིང་སྐྱིན་ཁེབས།།
ལྷ་སའི་ཁྲོམ་ན་མི་འདུག།།
མི་འདོད་གསང་གླིང་ཞྭ་མོ།།
ལྷ་སའི་ཁྲོམ་ན་ཤིག་ཤིག།