གང་ཞིག་སྨྲ་བའི་ཤེས་རབ་ལས་འདས་ཤིང་།།
བརྗོད་མེད་དངོས་གྲུབ་བསིལ་མའི་ཕྲེང་བ་གང་།།
འགྱུར་ཁུགས་སྟོང་ལྡན་འཛུམ་པའི་སྣང་བ་ཡིས།།
ཀུན་རྟོག་ཡིད་ཀྱི་འགྱུ་བ་ཅིག་ཅར་དྲངས།།
སྣང་སེམས་གཉུག་མའི་ངོས་ཀྱི་ཆེན་པོའི་གདེང་།།
ཟབ་རྒྱས་ལྟ་བའི་ཀློང་གི་མཐའ་བྲལ་སེམས།།
གང་ཞིག་སྟོང་དང་རྟེན་འབྱུང་རང་གསལ་བའི།།
འཁོར་འདས་གླུ་ཡི་སྙན་པ་ཕྱུར་བུར་གཏམས།།
སྒྱུ་འཕྲུལ་སྣང་བའི་ནགས་ཚལ་སྟུག་པོ་རུ།།
འབྲས་བཟང་གཡུར་དུ་ཟ་བའི་སྙིང་བོའི་རྡུལ།།
ཕྱོགས་དང་ཕྱོགས་སུ་འཕྱོ་ཞིང་ཁྱབ་པ་ཡིས།།
མི་ཟད་དཔལ་གྱི་མཛོད་ཆེན་ངག་ལ་འཁོར།།
མི་གཡོ་བདེ་ཆེན་བསམ་གྱིས་མི་ཁྱབ་པའི།།
གཉིས་ཟད་ཆོས་སྐུའི་རང་རྣམ་འཛིན་པ་ལ།།
དགེ་ལེགས་སྟོང་གི་ཕྱག་རྒྱ་བཅིངས་པ་ཡི།།
དྲང་སྲོང་ངག་གི་ཕོ་ཉ་ཁྱེད་ལས་སུ།།
དཔག་བསམ་སྐལ་བའི་ལྗོན་པ་གཡོ་བའི་རྩེར།།
འདབ་དྲུག་པདྨའི་གེ་སར་འཛུམ་པའི་དཔྱིད།།
ཚོགས་དྲུག་མཉམ་པ་ཉིད་ཀྱི་བར་སྣང་དུ།།
དབྱངས་ཅན་དགའ་མ་འབོད་པའི་ཀི་བསྭོ་ཡིས།།
ལན་ཅིག་མ་ཡིན་ཚོར་བའི་ཕོ་བྲང་ནས།།
སྐྱེ་རྒུའི་ཀུན་རྟོག་ར་རི་བསལ་བྱེད་ཀྱི།།
ཚངས་སྲས་མྱོས་པའི་གླུ་ལ་འགག་པ་མེད།།
དབྱངས་ཅན་ངག་གི་བདུད་རྩིའི་དོ་ར་ནས།།
སྲིད་ཞི་མཉམ་ཉིད་གཅིག་ཏུ་སྟོན་པ་ལ།།
ངལ་བ་ཏིལ་ཙམ་མ་མཆིས་སྐད་ཅིག་ཏུ།།
པི་ཝང་རྒྱུད་སྐུད་ཕྲ་མོར་སོར་འཁྱུག་གིས།།
བདེ་སྟོང་ངག་གི་རོལ་མོ་ཅི་ཡང་འཁྲོལ།།
ངག་རིག་བུང་བ་གཞོན་ནུའི་གླུ་སྐད་ཀྱིས།།
སྟོང་གསུམ་སྣོད་བཅུད་གོང་བུ་གཅིག་ཏུ་བསྒྲིལ།།
ཤེས་བྱའི་གཡུ་ལོ་རྒྱས་པའི་དགའ་ཚལ་ན།།
སྙན་འཇེབས་གདངས་དབྱངས་ཅི་དགར་བྱུང་བ་ཡིས།།
མཚར་སྡུག་སྟོང་གི་གཞལ་ཡས་མི་ཟད་པ།།
རྣམ་པ་སྣ་ཚོགས་དང་བཅས་ལོངས་སུ་སྤྱོད།།
འཛིན་མེད་སྣང་བ་ཕྱི་རོལ་ཡུལ་ལས་གཡོལ།།
མ་བཟུང་བློ་གྲོས་གཉུག་མའི་གཞི་རུ་འཁོད།།
སེམས་ཉིད་ཏིང་འཛིན་རོལ་མོའི་འགྱུར་ཁུགས་ཀྱིས།།
བདེ་སྟོང་སྤྲིན་དཀར་ཕུང་པོའི་ཚོམ་བུ་ལ།།
མངོན་པར་རྒྱུ་བའི་མཁའ་ལྡིང་དབང་བོར་འགྲན།།
འགག་མེད་གསུང་གི་རང་སྒྲ་རང་བྱོན་ལ།།
འདུན་པའི་རྩེ་བརྒྱ་མི་ཕྱེད་གཏད་པ་ལས།།
སྒྱུ་འཕྲུལ་ལྷ་མོའི་ངག་གི་འདུ་བྱེད་ལ།།
རྩོལ་མེད་ཤུགས་འབྱུང་དབྱངས་ཀྱིས་ཅོ་འདྲི་མཁན།།
རྗེས་ཆགས་ཡིད་འོང་ཕྱག་རྒྱའི་རོལ་བ་རྣམས།།
མངོན་པར་ཀུན་བྱེད་མགྲིན་དབྱངས་སྟོང་ལྡན་ངང་།།
ངོ་མཚར་སྙན་འཇེབས་ཟློས་གར་བསྒྱུར་འདི་རྨད།།