རི་དང་ནགས་ཀྱི་ཁ་དོག་སྐྱ་བོར་གྱུར།།
ཆུ་དང་གཙང་བོའི་རབ་ཁ་དར་གྱིས་གཡོག།
བྱ་དང་བྱིའུའི་འགྲེ་འགྱུར་ཙག་གིས་བསྡམས།།
དགུན་ཁའི་གཤིས་འདི་མཐོང་ན་ཡིད་རེ་མུག།
ལ་དང་ལུང་བར་གྲང་ངར་ཤུར་ཤུར་ལྡང་།།
བྱ་དང་རི་དྭགས་བཀྲེས་ཤིང་ཙག་གིས་གདུང་།།
གང་དང་གང་ལ་བསྐྱོད་པར་དཀའ་བ་ཆེ།།
དགུན་ཁའི་གཤིས་འདི་མཐོང་ན་ཡིད་རེ་མུག།
ཐལ་དང་རྡུལ་གྱིས་གནམ་ས་འཁྲུགས་ཙམ་བྱས།།
གྲོང་དང་གྲོང་ཁྱེར་ཐལ་རྡུལ་ཡོམ་ཡོམ་གཡོ།།
མཛེས་ཉམས་གསོན་མདངས་མེད་པའི་མི་ཚོགས་ཤིག།
དགུན་ཁའི་གཤིས་འདི་མཐོང་ན་ཡིད་རེ་མུག།
ཆུང་ཆུང་བྱིས་པའི་ངོ་གདོང་ཙག་གིས་བྱིད།།
ལོ་ལོན་རྒན་པོའི་རྐང་ལག་ཙག་གིས་བྱིད།།
གཞོན་པའི་སྣང་བ་སྤྲོ་པོ་ཙག་གིས་ཁེངས།།
དགུན་ཁའི་གཤིས་འདི་མཐོང་ན་ཡིད་རེ་མུག།