གཉིད་ལས་སད་རྗེས།
ངའི་སྙིང་ཉེ་བའི་ཁྱོད་རང་དྲན།
ཁྱོད་ཀྱི་བྱད་བཞིན་དང་སྒེག་ཉམས།
ཟུར་མིག་དང་མཆུ་སྒྲོས།
གཡོ་ལྡན་བུང་བ་ཡི་ཐིག་ལེ་བཞིན།
རྒྱ་སེ་མེ་ཏོག་གི་འདབ་མ་བཞིན།
ལང་ཚོ་ཡི་གཤོག་ཟུང་བརྐྱངས་ཏེ།
སླར་ཡང་ང་ཡི་དྲན་འཛིན་གྱི་ནམ་མཁར་འཕུར་ཡོང་།
ང་ཡི་སེམས་རྟེན། སྙན་ངག སྙན་ངག
སྟོན་མཇུག་གི་འཇག་གླུ།
སྟོན་མཇུག་ལ།
སྡོང་མགོ་ཡི་ལོ་མ་དག
སྔར་ཡང་ཧྲལ་ཧྲུལ་གྱིས་འཐོར་མགོ་བརྩམས།
ངས་མེ་ལོང་ནང་གི་རང་ཉིད་ལ་ཡང་ནས་བསྐྱར་དུ་བལྟས།
རིད་ཅིང་སྐམ་པའི་ངོ་གདོང་དང་།
བརླན་ལ་སྙི་བའི་མིག་ཟུང་ལ་བལྟས།
ཅི་ཡང་མི་འདུག ཅི་ཡང་མི་འདུག
ཐ་ན་རང་ཉིད་མཚོན་བྱེད་ཀྱི་ཤ་ཀོ་འདི་ཡང་།
སྙིང་པོས་སྟོང་བའི་བེམ་པོ་ཙམ་མོ།།
