དཔུང་ཤ་མེ་རུ་བྲུས་ཏེ་དྲན་པ་རྣོ་སྐུད་དུ་བསྒྲིམས་རྗེས།
རྡོ་གཅལ་སྟེང་དུ་དྷིཿཡིག་འཚོལ་འགོ་བརྩམས།
གཏན་ཚིགས་ཀྱི་ཕྲེང་རྡོག་རེ་རེ།
ཤོག་ལྷེ་ཧྲལ་ཧྲུལ་གྱི་ལ་ལུང་ནས་བཏུས།
དེ་དུས།
དབུ་ལྗོན་དཀར་བའི་ཕྱག་དཔེ་སྣ་རིང་།
རས་གཟན་ཁོ་ནའི་འོག་གི་མཆོད་མེ་ཡིན་ཟེར།
མེ་ཏོག་དཀར་དམར་མང་དུ་བཞད་རུང་།
ཁྱེད་ཀྱིས་དབྱར་ཁ་ཁྲ་ཁྲ་མིན་ཚུལ་ཡང་ཡང་གསུངས།
མཚན་མོ་དེར།
དིང་གླིང་ལས་བཞུར་བའི་མིག་ཆུ་གྲང་མོ་ཞིག
བྱ་བྲལ་བའི་སྒེའུ་ཡོལ་ལ་སྲོད་རླུང་གིས་བསྐུས།
ལྟས་དབང་དེས།
མི་ལ་རས་པའི་སྒོམ་ཐག་དེ།
ཚངས་དབྱངས་རྒྱ་མཚོའི་སྨྱུག་གླིང་ལ་བརྗེས་སྐད།
ལོ་ཟླའི་ཉིན་སྲིབ་གླེགས་བུར་བལྟེབས་རྗེས།
བཙལ་བཙལ་ཏེ་རྙེད་པ་ནི་ཏཾ་ཡིག་ཅིག
དེ་ནི། གདོད་མའི་ཁམས་ཀྱི་ཨ་ཡིག་དཀར་པོ།
འཁོར་བའི་གཏིང་གི་ཎྲྀ་ཡིག་ལྗང་ཁུ།
ང་དང་ཁྱོད་ཀྱི་བྷྲཱུཾ་ཡིག་གྲུ་བཞི་དེ།
ངུར་སྨྲིག་གི་གྲུ་ཁེམ་དང་ལས་དབང་གི་ཀོ་གྲུ།
སྲིད་པའི་མཚོ་ངོགས་ན་ལྒང་ལི་ཆུང་ཆུང་ཞིག
ཨུ་ཐུགས་ཚེ་ཤུགས་ཀྱིས་བོས་དང་།
ཏཾ་ཡིག་གི་འོད་ཟེར་ལྗང་ཁུས།
ཁྱོད་ལ་དབུགས་དབྱུང་གཞན་ཞིག་སྩོལ་ངེས།
དེ་ནི། ས་ལ་བྲིས་པའི་གཤོང་གཤོང་དེ་མ་ཡིན་ལ་རྡོ་ལ་བརྐོས་པའི་ཤུར་ཤུར་དེའང་མ་ཡིན།
དེ་ནི། ཆུ་ལ་ཤར་བའི་རམ་རིམ་དེ་མ་ཡིན་ལ་མཁའ་ལ་དོད་པའི་ཡེར་ཡེར་དེའང་ག་ལ་ཡིན།
དེ་ནི། ནམ་རྒྱུན་ཆེས་དྭངས་པ་ཞིག་སྟེ།
ལན་རེར་ཧ་ཅང་གི་སྙོག་མ་ཅན་ཞིག