དཀར་གཙང་དཔེ་དེབ་སྨྱུ་གུ་གྲོགས་སུ་འཐམ།།
དབྱངས་གསལ་སོ་བཞིའི་དབྱངས་རྟ་ངག་ནས་གྱེར།།
ཤེས་རིག་བདུད་རྩིར་རོལ་བའི་སློབ་མའི་ཚོགས།།
སྦྱངས་འབྲས་བཟང་བོ་སྨིན་པའི་ཁ་གཡང་འབོད།།
ཤེས་རིག་ནོར་བུས་ཕྱུག་པའི་སློབ་གླིང་དེར།།
ཤེས་བརྩོན་ཅང་ཤེས་རྟ་མཆོག་ལ་ཞོན་ཏེ།།
ཤེས་བྱའི་ཕུགས་འདུན་འཚོལ་བའི་སློབ་མ་ཚོ།།
ཤེས་ཡོན་ནོར་གྱིས་ཕྱུག་པའི་སྨོན་འདུན་ཞུ།།
ཤེས་ལྡན་ལེགས་བཤད་སྦྲང་ཆར་ཟིམ་མའི་འོག།
ཤེས་རིག་ལང་ཚོའི་འདབ་མ་དལ་གྱིས་བཞད།།
ཤེས་རབ་རྣམ་དཔྱོད་གཤོག་ཟུང་རྒྱང་དུ་རྐྱོང་།།
ཤེས་བཟང་ནོར་བུ་ལེན་པར་ཉམས་རེ་དགའ།།
ཡོན་ཏན་ངོམས་པ་མེད་པར་མདུན་དུ་སྐྱོད།།
བརྩོན་འགྲུས་ལྷོད་པ་མེད་པའི་ཆུ་མོ་བཞུད།།
རིག་པའི་སློབ་གླིང་འགྲིམས་པའི་སློབ་མའི་ཚོགས།།
བསམ་པའི་དོན་ཀུན་འགྲུབ་པའི་བཀྲ་ཤིས་ཤོག།
རིན་བྲལ་ཤེས་རིག་མིའི་རིགས་གཅེས་ནོར་ཆེ།།
མི་ཉམས་འཛིན་སྐྱོང་སྤེལ་གསུམ་སློབ་མར་རག།
ལྷོད་མེད་ཐོས་བརྩོན་གྲུ་བོ་ལ་ཞུགས་ཏེ།།
རྒྱལ་ཁའི་འབྲས་བཟང་མུ་ནས་མུ་མཐུད་ལོན།།
བཀྲ་ཤིས་དབྱར་ཟླ་འགོ་མའི་དཔལ་ཡོན་ཀློང་།།
ཤེས་གླིང་སློབ་ལ་བཞུགས་པའི་སློབ་མའི་ཚོགས།།
ཕུགས་འདུན་ལམ་བཟང་སློབ་གླིང་ཐེམ་སྐས་སུ།།
བདེ་བླག་ངང་དུ་འཇུག་པའི་སྨོན་ཚིག་སྒྲོན།།
