ལོ་ཟླའི་མེ་ཏོག་མཛེས་པོ་རིམ་བཞིན་རྫོགས་ནས།།
ན་ཚོད་གཞོན་པའི་འདབ་མ་སད་ཀྱིས་འཇོམས་ཡང་།།
རེ་བའི་མདའ་སྣེ་གཏད་སོ་འགྱུར་བ་མེད་པར།།
འདུ་བྱེད་ངག་གི་སྐུད་པར་དམ་པོ་འཇུ་འདོད།།
དགའ་སྐྱོའི་ཚོར་བ་དབྱར་གཞུང་སྤང་དུ་བཞད་དུས།།
འཛུམ་ཆུང་གཟི་འོད་གཙང་བོའི་འགྲམ་ནས་འཚེར་དུས།།
གློ་བུར་གྲེ་བའི་འགྱུར་ཁུགས་ཟབ་མོ་རྡུང་པ།།
སྐྱེ་བར་ཡིད་སེམས་འཁྲེངས་བའི་ལན་ཆགས་ཡིན་སོང་།།
རི་མོ་མཛེས་མཛེས་དག་ཏུ་ཧུར་བརྩོན་བྱས་ཀྱང་།།
ལས་ལ་མ་ཞུགས་ཙམ་ལས་ཅི་ཡང་མ་འཁྱོངས།།
དར་དར་སྒྱུ་མའི་ལང་ཚོ་ཕྲག་ཏུ་བབས་དུས།།
ཕྲ་ལ་མཉེན་པའི་གཟུགས་བྱད་མཐོང་ན་དགའ་བ།།
ལེགས་བྱས་རིན་ཐང་ཅན་ཞིག་རྙེད་པ་མེད་ཀྱང་།།
རེ་འདུན་གྲུ་གཟིངས་བརྒལ་བར་གོམ་མཚམས་མ་ཆད།།
ནམ་ཡང་འཚོ་བའི་གཡས་ཟུར་གང་རུང་ཞིག་ནས།།
བརྗེད་མེད་ཡིད་ཀྱི་སྨོན་པར་གསོལ་བ་བཏབ་ཡོད།།
རང་སེམས་སྙི་མོ་ཞིག་གི་སྐྱོ་བའི་ཡུན་ལ།།
གུ་ཡངས་བག་ལྷོད་བཅའ་བའི་གཟིམ་ཆུང་ནང་དུ།།
སྡུག་གི་ཤུགས་རིང་འབྱིན་ནས་མི་ཚེ་གཏོང་བ།།
མཐོང་བའི་མོད་ལ་སུ་ཡིས་འཕྱ་སྨོད་བྱེད་སྲིད།།
འཁོར་བར་ཨ་ཐང་ཆད་དེ་གནས་ནས་ཡོད་ཀྱང་།།
སྔར་བཞིན་མགྲིན་ལས་འཁྲུངས་པའི་དབྱངས་ལ་ཉན་དུས།།
མི་བདེན་སྒྱུ་མས་བསླུ་བྲིད་གཏོང་བ་མེད་ན།།
རང་སེམས་སྐྱོ་བའི་སྨུག་པ་རིམ་གྱིས་དྭངས་འགྲོ།།
མཛེས་སྡུག་ཆུ་སྐྱེས་དགོད་པའི་ཉམས་དགའི་ཚལ་ནས།།
བདེ་མོའི་བྲོ་བར་འཁྲབས་པའི་མོ་གཞོན་དར་མ།།
ཡིད་ཀྱི་རྟེན་དུ་རིང་ནས་བཞེངས་པར་མཛད་ན།།
ལྷན་འཛོམས་འཚོ་བའི་སྡེར་ཁ་ད་ཆར་སྒྲིག་ཆོག།
མི་རྟག་འཇའ་ཡི་རང་གཤིས་འདི་འདྲ་ཞིག་སྟེ།།
ད་ཡོད་མཛེས་སྡུག་ལྡན་ཡང་ད་ཆར་གཟིམ་འགྲོ།།
ཡོད་ལ་མེད་པའི་མཐའ་ནས་དུས་ཚོད་དེ་དག།
མ་ཤོར་དམ་འཛིན་གནང་ན་དེ་གས་ཆོག་འདུག།
སོར་མོའི་འཕྲུལ་ལས་སོན་པའི་ངག་གི་རྩེད་འཇོ།།
བཅོས་བཅོས་སྣང་བའི་གཞུང་ནས་སེམས་ཀྱིས་རོལ་ན།།
དུས་བཞིའི་འགྱུར་ལྡོག་ཀློང་གི་ངང་ཚུལ་དག་ལ།།
ཅི་ཡང་ལྟ་རྒྱུ་མེད་དེ་མདུན་དུ་སྐྱོད་དགོས།།
དབྱངས་སྙན་ཅོ་ཀའི་འཕྲིན་ཆུང་རྒྱང་དུ་སྐུར་ན།།
ང་ཡི་ཞེ་འདྲིས་བུ་མོས་གསན་ཐབས་ཡོད་དམ།།
བདག་ནི་སྤྱིལ་ཆུང་ཞིག་ཏུ་གནས་མལ་བཅའ་ནས།།
ཁེར་རྐྱང་གདུང་བའི་འབོད་པ་ངག་ལ་ཐལ་སོང་།།
