དེ་རིང་དབྱར་གསུམ་ཁུ་བྱུག་གསུང་སྐད་དང་འགྲོགས་ནས།།
བདག་གི་དར་ལུང་རྣ་བའི་སྙན་གྱི་བུ་ག་རུ།།
ཡུན་རིང་སེམས་ནས་སྒུག་པའི་གཏམ་བཟང་འཕྲིན་ངག་ཅིག།
ལྷང་ལྷང་འཁྲོལ་བའི་དགའ་སྟོན་ཡིད་ཀྱི་གསོས་སུ་སྨིན།།
སྙིང་ནས་གཅེས་པའི་རིག་བཟང་ཚ་མོ་བརྩོན་ལྡན་མ།།
རྒྱུགས་སྤྲོད་གཡུལ་ས་ལས་རྒྱལ་ཕུལ་བྱུང་སྐར་འབྲས་ཀྱིས།།
རང་གི་ཕུགས་བསམ་ཁྲོད་ཀྱི་སློབ་གྲྭ་དེ་ཉིད་ལ།།
རྒྱུགས་ཚད་ལོན་པས་ཁུ་བོ་ང་རང་སྤྲོ་བས་བརྟས།།
སློབ་འབྲིང་ལོ་ངོ་གསུམ་གྱི་ལོ་ཟླའི་དུས་ཡུན་དུ།།
ཚ་མོ་ཁྱེད་ཀྱིས་རང་རྟོགས་བསླབ་བརྩོན་ནུས་མཐུ་ལས།།
རྒན་གྱི་གསུང་དང་ཕ་མའི་རེ་བཅོལ་དང་བླངས་ཏེ།།
བསླབ་ཚན་ཁག་ལ་ནན་གྱིས་སྦྱངས་པའི་གྲུབ་འབྲས་རྨད།།
དེ་རིང་ཁྱེད་ཀྱི་རྨི་ལམ་མངོན་དུ་གྱུར་བ་ཡིན།།
དེ་རིང་ཁྱེད་ཀྱི་རྒྱལ་ཁའི་རྟེན་འབྲེལ་ཚེས་པ་ཡིན།།
འདི་ནི་འབད་པའི་རིན་དོད་ཅིག་གི་མཚོན་རྟགས་ཡིན།།
འདི་ནི་རང་རྩོལ་ལས་ཀྱིས་བསྐྲུན་པའི་ལོ་ལེགས་ཡིན།།
ན་ཆུང་སློབ་མ་ཞིག་གི་དམ་བཅའི་རི་མོ་དེ།།
དོན་སྨིན་ལེགས་གྲུབ་བྱུང་ལ་བདག་སེམས་ཅིས་མི་སྤྲོ།།
ཨ་མའི་བུ་མོ་ཞིག་གི་སྙིང་སྟོབས་གོ་ཆ་འདིར།།
སྐུལ་ལྕག་ཚིག་གི་བསྟོད་བསྔགས་འབུལ་བར་ཅིས་མི་འོས།།
སླད་ཕྱིན་གསེར་ལྗོངས་ཁྲི་ཀའི་སློབ་རའི་དགའ་ཚལ་དེར།།
ཤེས་རིག་རྟ་ཕོར་བརྩོན་འགྲུས་ལྕག་གིས་བསྐུལ་བཞིན་དུ།།
སློབ་རའི་དགའ་ཚལ་འགྲིམས་པའི་ཉིན་མཚན་དུས་དྲུག་ཀུན།།
སྐད་ཅིག་ལྷོད་གཡེང་མི་གཏོང་ཉེར་བསྡོགས་ད་ནས་རེམ།།
ན་སོ་ཆུང་བའི་གསེར་གྱི་དུས་འདི་དམ་འཛིན་བྱོས།།
སློབ་གྲོགས་བར་ན་མཐུན་སྒྲིལ་མཛའ་བརྩེ་གསེར་ཟམ་སྦྲེལ།།
རྒན་གྱི་བཀའ་དང་ཕ་མའི་རེ་བཅོལ་སྙིང་ལ་ཆོངས།།
ཤེས་བྱའི་སྒོ་ཐེམ་རེ་རེར་གོམ་ཆེན་སྤོ་བཞིན་བསྐྱོད།།
དེའང་རྗེས་ཀྱི་རྒྱུགས་སྤྲོད་རེ་རེའི་སྐབས་སུ་ཡང་།།
དེ་རིང་ལྟ་བུའི་བརྩོན་པའི་ལས་ལ་ལྷུར་བླངས་ཏེ།།
རང་གི་མདུན་ལམ་འོད་སྟོང་ལྡན་པའི་ཕྱོགས་ལ་ཆས།།
ཕུགས་བསམ་ཞིང་གི་སློབ་ཆེན་ཞིག་ལ་རེ་སྙེག་བྱོས།།
ལས་རིགས་དགའ་ཕྱོགས་གང་ཞིག་དོན་དུ་གཉེར་བ་ལ།།
ད་ནས་དམིགས་འབེན་གསལ་བོའི་སྟ་གོན་གཏན་འབེབས་བྱོས།།
མིག་རྒྱང་རིང་ཞིང་བློ་ཁོག་བརྟན་པོའི་འདུན་མ་ཡིས།།
རང་གཞན་ཀུན་ཕན་ཚུལ་ལྡན་མི་ཞིག་ཨེ་འཁྱོངས་ལྟོས།།
སྙིང་གི་གཅེས་ཕྲུག་ཚ་མོ་ཁྱེད་ལ་ཕུལ་བའི་གཏམ།།
རྟེན་འབྲེལ་སྙིང་གི་ལེགས་སྐྱེས་ངག་རིག་ཕྲེང་བ་འདི།།
གཡུར་ཟའི་རྒྱུགས་འབྲས་རླུང་རྟ་དར་བའི་བསུ་མ་རུ།།
ཁུ་བོ་ང་རང་རབ་ཏུ་དགའ་བཞིན་འཕྲལ་དུ་སྦྱར།།
