ངེད་་གསར་འགྱུར་གྱི་གསར་བཀོད། ཉེ་ཆར། རྔ་བ་རྫོང་ཁོངས་གཏོགས་ཁུལ་དུ་བསྟུད་མར་ཆར་བ་བབས་པས་རི་ཉིལ་བ་དང་། རྡོ་ལྷུང་བ། འདམ་རྡོའི་ཆུ་རུད་སོགས་ས་གཤིས་ཀྱི་གནོད་འཚེ་འབྱུང་སླ་བས། གནོད་འཚེ་སྔོན་འགོག་ཚོད་འཛིན་གྱི་དུས་བབ་ཛ་དྲག་དང་རྙོག་འཛིང་ཆེ་བ་རེད། ས་གཤིས་གནོད་འཚེའི་བདེ་འཇགས་འགོག་སྲུང་གི་འཛིང་རགས་བརྟན་པོ་བསྐྲུན་ནས་ཁོངས་གཏོགས་ཁུལ་གྱི་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་ནུས་ཤུགས་ཡོད་རྒུས་འགན་ལེན་བྱེད་ཆེད། རྔ་བ་རྫོང་རང་བྱུང་ཐོན་ཁུངས་ཅུས་ཀྱིས་མགྱོགས་མྱུར་སྒོས་ཆེད་ལས་རིམ་བཤེར་དཔུང་ཁག་རྩ་འཛུགས་བྱས་ཏེ་གཞི་རིམ་དུ་བསྐྱོད་ནས་ཆར་རྗེས་ཀྱི་ས་གཤིས་གནོད་འཚེའི་བྱུར་རྐྱེན་དྲྭ་སྦྲེལ་རྣམ་པའི་རིམ་བཤེར་བཅོས་སྒྲིག་བྱས།
ཐེངས་དེའི་རིམ་བཤེར“ཁྱོན་ཡོངས་ལ་ཁྱབ་པ་དང་། ཆད་ལྷག་མེད་པ། གནད་འཁེལ་ལ་མཐོང་ཆེན་བྱེད་པ། བཅོས་སྒྲིག་ནན་པོ་བྱེད་པའི”བླང་བྱ་ནན་སྲུང་བྱས་ནས། ས་གཤིས་གནོད་འཚེ་བྱུང་མང་བའི་གནས་དང་། འབྱུང་སླ་བའི་གནས་བཅས་ཀྱི་ས་ཁོངས་ལ་དམིགས་ཏེ་གཙོ་གནད་གནས་ཀྱི་བྱུར་རྐྱེན་རིམ་བཤེར་བྱས། རིམ་བཤེར་བྱེད་པའི་སྐབས་སུ། ལས་དོན་མི་སྣས་ཉེན་ཁ་ཡོད་པའི་གནས་ཚང་མར་སྐོར་ཞིབ་ཞིབ་ཚགས་བྱས་ཏེ་རི་ངོས་ཀྱི་ས་ཞིག་ཡོད་མེད་དང། རི་ངོས་སུ་གས་སྲུབས་གསར་བ་བྱུང་ཡོད་མེད་། བགྲོད་ལམ་དུ་རྡོ་ལྷུང་ཡོད་མེད་སོགས་ཉེན་ཁའི་བྱུར་རྐྱེན་ལ་རེ་རེ་བྱས་ནས་ཞིབ་བཤེར་བྱས་ཏེ། ད་ལྟའི་གནས་ཚུལ་དང་། ཉེན་ཁའི་རིམ་པ། འགྱུར་ལྡོག་གནས་ཚུལ་བཅས་རེ་རེ་བཞིན་ཐོ་འགོད་བྱས་ནས་བྱུར་རྐྱེན་རིམ་བཤེར་འགུལ་རྣམ་གསར་བརྗེས་བྱས་ཏེ། ཆར་རྗེས་ས་གཤིས་གནོད་འཚེའི་བྱུར་རྐྱེན་གྱི་གནས་ཚུལ་གནད་ལ་འཁེལ་བའི་སྒོ་ནས་ཁོང་དུ་ཆུད་པ་བྱས་ནས། ཉེན་ཁའི་གནས་ཚུལ་གསལ་བོ་དང་སྔོན་འགོག་ཚོད་འཛིན་གྱི་བྱེད་ཐབས་ནན་ཏིག་ཡོང་བར་བྱས།
རྗེས་ཕྱོགས་སུ། རྔ་བ་རྫོང་གིས་ཆུ་བྲུག་དུས་ཀྱི་བདེ་འཇགས་སྔོན་འགོག་ནན་སྲུང་བྱས་ནས། རྒྱུན་རྣམ་ཅན་གྱིས་ཆར་རྗེས་ཀྱི་བྱུར་རྐྱེན་རིམ་བཤེར་འགུལ་རྣམ་དོ་དམ་ཚོད་འཛིན་དང་། གནད་དོན་ཀུན་གྲུབ་བཅོས་སྒྲིག ལྟ་ཞིབ་ཚད་ལེན་དང་ཉེན་བརྡའི་ལས་རེས་བཅས་ལ་རྒྱུན་མཐུད་ཤུགས་སྣོན་བརྒྱབ་ཏེ། ས་གཤིས་གནོད་འཚེ་སྔོན་འགོག་ཚོད་འཛིན་གྱི་བདེ་འཇགས་དྲ་བ་རྒྱུན་ཆད་མེད་པར་དམ་པོ་བཙུགས་ནས་ནུས་པ་ཡོད་རྒུས་ཁོངས་གཏོགས་ཁུལ་གྱི་མི་དམངས་མང་ཚོགས་ཀྱི་ཚེ་སྲོག་དང་བདེ་འཇགས་སྲུང་སྐྱོབ་བྱ་རྒྱུ་རེད།
（གསར་འགོད་པ་ཏིང་འཛིན་འཚོ།）
