ངེད་གསར་འགྱུར་གྱི་གསར་བཀོད།གསེར་མདོག་གིས་བརྒྱན་པའི་སྟོན་ཟླ་དགུ་བར།འཛམ་ཐང་རྫོང་རྡོ་སྟོད་ཡུལ་ཚོར་དྲོད་སྐྱིད་ཀྱིས་ཁྱབ་ཡོད་དེ། བྱམས་བརྩེའི་སློབ་སྐྱོར་རོགས་རམ་གྱི་བྱེད་སྒོ་ཞིག་རྡོ་སྟོད་ཡུལ་ཚོའི་ལྟེ་བའི་སློབ་ཆུང་དུ་གཟབ་རྒྱས་ངང་མགོ་ཚུགས། ཐེངས་འདིའི་བྱེད་སྒོར“ལམ་གཏོད་གདོང་ལེན་པའི”སློབ་སྐུལ་བྱ་དགའི་དངུལ་དང“འགྲིམ་འགྲུལ་རོགས་སྐྱོར”གྱི་སློབ་སྐྱོར་རོགས་དངུལ་ཏེ། བརྩེ་སེམས་མ་རྩའི་སྒོར་ཁྲི་9བསྡུས་ནས་གྲོང་གསེབ་སློབ་མར་ཆེད་གཉེར་རོགས་སྐྱོར་གྱིས་མཐོ་སྒང་བུ་ཕྲུག་ལ་ཕུགས་བསམ་གྱི་ལམ་བུ་འགྲུབ་པར་རམ་འདེགས་བྱས།

སློབ་སྐྱོར་རོགས་རམ་སློབ་རར་འདུས་ནས་ན་གཞོན་ཚོའི་ཕུགས་འདུན་ལ་སྐྱོར་མ་བྱས། རྒྱུས་ལོན་པ་ལྟར་ན། ཐེངས་འདིའི“ལམ་གཏོད་གདོང་ལེན་པའི”སློབ་སྐུལ་བྱ་དགའི་དངུལ་དང“འགྲིམ་འགྲུལ་རོགས་སྐྱོར”གྱི་སློབ་སྐྱོར་རོགས་དངུལ་ནི་སྤྱི་ཚོགས་ཀྱི་བརྩེ་སེམས་གྲོང་གསེབ་ཏུ་སླེབས་པ་ཞིག་ཡིན་ལ། བརྩེ་སེམས་མ་དངུལ་སྒོར་ཁྲི་9ཡིས་རྡོ་སྟོད་ཡུལ་ཚོའི་ལྟེ་བའི་སློབ་ཆུང་ཕུལ་བྱུང་སློབ་མར་སྐུལ་མ་དང་དཀའ་ཁག་ཅན་ལ་རོགས་རམ་བྱས་ནས། མཐོ་སྒང་སློབ་མའི་སློབ་ཞུགས་ཀྱི་དཀའ་ཁག་སེལ་ཞིང་གྲོང་གསེབ་ཀྱི་སློབ་མ་སེམས་ཀྱིས་འཚོས་ཡོད།

བྱེད་སྒོའི་ཡུལ་དངོས་སུ། དགེ་སློབ་ཀྱི་འཐུས་མི་ལྷན་དུ་འཛོམས་ནས་བརྩེ་བའི་སློབ་སྐྱོར་ལ་བདེན་དཔང་བྱས། བྱེད་སྒོའི་ཁྲོད། སློབ་སྐྱོར་རོགས་རམ་གྱི་མ་དངུལ་ཁག་གཉིས་དངོས་སུ་བཙུགས་པ་ཁྱབ་བསྒྲགས་བྱས་པ་དང་། བརྩེ་བས་ཕྱུག་པའི་མ་དངུལ་འདིས་མཐོ་སྒང་སློབ་གསོའི་སྤྲོ་སེམས་དང་ལོ་ཆུང་སློབ་མའི་རེ་བ་མཚོན་པར་བྱས་ནས། གྲོང་གསེབ་སློབ་གསོའི་འཕེལ་རྒྱས་ལ་རམ་འདེགས་བྱས།

ངོ་སྤྲོད་བྱས་པ་ལྟར་ན། “ལམ་གཏོད་གདོང་ལེན་པའི”སློབ་སྐུལ་བྱ་དགས་རྒྱ་ཆེའི་སློབ་གྲོགས་ཚོར་མདུན་སྐྱོད་དང་ཡར་རྒྱས། སྙིང་སྟོབས་ཀྱིས་མདུན་སྐྱོད་བྱ་དགོས་པའི་སྤོབས་པ་བསྩལ་བ་དང་། “འགྲིམ་འགྲུལ་རོགས་སྐྱོར”གྱི་སློབ་སྐྱོར་རོགས་དངུལ་གྱིས་སློབ་ཞུགས་ལམ་བུའི་དཀའ་ངལ་སེལ་ནས་རང་གི་ཕུགས་བསམ་གྱི་ཆེད་དུ་སྤོབས་པ་དང་མདུན་སྐྱོད་ཐུབ་པར་བྱས་ཡོད།

ཐེངས་འདིའི་བརྩེ་སེམས་རོགས་སྐྱོར་བྱེད་སྒོས་རྡོ་སྟོད་ཡུལ་ཚོའི་སློབ་ཕྲུག་ཚོར་དངོས་པོའི་རོགས་སྐྱོར་བྱས་པ་ཁོ་ན་མ་ཡིན་པར། ཡུལ་ཚོ་ཡོངས་སུ་རིག་གནས་ལ་བཀུར་ཞིང་སློབ་སྦྱོང་གཙིགས་སུ་འཛིན་པ། དྲིན་ཤེས་མདུན་སྐྱོད་དང་སློབ་ལ་འབད་པའི་ཁོར་ཡུག་བཟང་བོ་བསྐྲུན་ཡོད། བརྩེ་སེམས་སློབ་སྐྱོར་གྱི་སྐྱེས་འབུལ་འདིས་གྲོང་གསེབ་སློབ་གསོའི་ཞན་ཆ་ཁ་གསབ་བྱས་ནས། མཐོ་སྒང་གྲོང་གསེབ་དར་སྤེལ་གཏོང་བར་འཇོན་མི་གསོ་སྐྱོང་བྱས།

གོམ་སྟབས་རྗེས་མར། རྡོ་སྟོད་ཡུལ་ཚོས་བརྩེ་སེམས་རོགས་སྐྱོར་གྱི་མ་དངུལ་ལུགས་མཐུན་ངང་བེད་སྤྱོད་བྱས་ནས། རོགས་སྐྱོར་གནད་ཁེལ་དང་སློབ་མར་ཡར་སྐུལ་བྱས་ཤིང་། སྤྱི་ཚོགས་ཀྱི་བརྩེ་བ་གཅིག་བསྡུས་ཀྱིས་གྲོང་གསེབ་སློབ་གསོའི་ཞིང་སར་མཐོ་སྒང་གཞོན་ནུའི་ཕུགས་འདུན་སྲུང་རྒྱུ་རེད།

（འཕྲིན་སྤེལ་བ།ཚེ་རིང་སྐྱིད།སྐལ་བཟང་སྐྱབས།）