【ནང་དོན་གནད་བསྡུས】རྒྱལ་ཡོངས་ཆོས་ལུགས་བྱ་བའི་ཚོགས་འདུ་རུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འདི་སྐད་དུ།“སྤྱི་ཚོགས་འཆམ་མཐུན་དང་།དུས་རབས་ཀྱི་འཕེལ་རྒྱས།བདེ་ཐང་གི་དཔལ་ཡོན་བཅས་ལ་ཕན་ནུས་ཐོན་པའི་ཆོས་ཀྱི་ནང་དོན་དང་ཆོས་ཁྲིམས་ཀྱི་རིགས་སྔོན་འདོན་བྱ་དགོས་པ་དང་།ཆོས་ཀྱི་ནང་དོན་དང་ཆོས་ཁྲིམས་ལ་དེང་རབས་ཀྲུང་གོ་འཕེལ་རྒྱས་སུ་གཏོང་བའི་རེ་བ་དང་།ཀྲུང་ཧྭའི་སྲོལ་རྒྱུན་རིག་གནས་ཕུལ་བྱུང་དང་མཐུན་པར་འཆད་འགྲེལ་བྱ་དགོས་པར”（1）གསུངས་ཡོད་པ་ལྟར། བློ་སྦྱོང་ཞེན་པ་བཞི་བྲལ་དང་འབྲེལ་བའི་ཀུན་སྤྱོད་ཀྱི་བླང་བྱ་རྣམས་ལ་ཁྱབ་སྤེལ་བྱེད་པའི་དགོས་པ་ཆེན་པོ་ཡོད། 《ཞེན་པ་བཞི་བྲལ》དུ་ཤུགས་སུ་བསྟན་པའི་ལས་འབྲས་ཀྱི་རྣམ་གཞག་དང་།རྟེན་འབྲེལ་གྱི་རིགས་པ།བྱང་ཆུབ་མཆོག་ཏུ་སེམས་བསྐྱེད་པ་དང་།མཐའ་གཉིས་སྤངས་པའི་དབུ་མ་ལ་འཇུག་ཚུལ་རྣམས་རིམ་པ་བཞིན་དུ་མི་ལུས་དོན་ལྡན་བྱེད་པ།སྡུག་བསྔལ་བསལ་ནས་བདེ་སྐྱིད་བསྐྲུན་པ།གཞན་ཕན་གྱི་སེམས་སྐྱེད་པ།བདག་དང་བདག་གིར་འཛིན་པའི་བསམ་པ་དང་བྲལ་ནས་སྤྱི་པའི་ལས་དོན་ལ་བརྩོན་པ་བཅས་འཆམ་མཐུན་གྱི་སྤྱི་ཚོགས་དང་།འཆམ་མཐུན་གྱི་འཛམ་གླིང་ཞིག་འཛུགས་སྐྲུན་བྱེད་པར་ཕན་ནུས་འདོན་ཐུབ་བོ།།

【བརྡ་ཆད་གཙོ་བོ】བློ་སྦྱོང་།ཀུན་སྤྱོད།དེང་རབས་དཔལ་ཡོན།

གཅིག དགེ་སྡིག་གི་བླང་དོར་ལ་ཚུལ་བཞིན་དུ་འཇུག་དགོས་པར་བསྟན་པ།

ཆོས་ལུགས་དང་མཚན་ཉིད་རིག་པའི་རྣམ་གཞག་རྣམས་གཙོ་བོར་མི་ཚེའི་གནད་དོན་དང་། འཚོ་གནས་ཀྱི་སྡུག་བསྔལ། བདེ་སྐྱིད་ལ་བཅངས་པའི་འདུན་པ་རྣམས་གནད་དུ་བཟུང་ནས་བཏོན་པ་ཡིན་ལ།ཕྱི་རོལ་གྱི་སྟོན་པ་སྐོར་ཅིག་གིས་དེ་དག་རྒྱུ་མེད་གློ་བུར་དུ་བཞེད་པ་དང་།ལྷ་དང་དེའི་སྤྲུལ་པས་གཏན་འཁེལ་དུ་བྱས་པར་འདོད་པ་ཡང་ཡོད།ནང་པའི་གཞུང་ལུགས་སུ་སྣོད་བཅུད་ཐམས་ཅད་རྟེན་འབྱུང་དང་འབྲེལ་ཡོད་པ་དང་།དེ་དག་ཚང་མ་རྟག་ཅིང་བརྟན་པ།འགྱུར་འཆོས་བྱེད་མི་རུང་བ་ཞིག་ཏུ་མི་འདོད་པར།ལས་སུ་བཏགས་པའི་སེམས་བྱུང་བསམ་པ་སྣོད་བཅུད་ཀྱི་རྩོམ་རྒྱུར་ངེས་ཏེ། བདེ་སྡུག་གི་བྱེད་པོ་རང་ཉིད་ཡིན་པ་དང་།དོན་ཀུན་འགྲུབ་པ་རང་ལག་ཡོད་ཏུ་ཡོད་པར་ལས་འབྲས་བསླུ་མེད་ཀྱི་རྣམ་གཞག་བྱས་ཡོད།

སྡོམ་གསུམ་རབ་དབྱེ་ལས།བདེ་སྡུག་ལས་ཀྱིས་བྱས་པ་ཡིན།། ལས་ཀྱི་བྱེད་པོ་སེམས་ཉིད་ཡིན།། སེམས་ནི་དགེ་དང་མི་དགེ་བའི།།སྟོབས་ཀྱིས་ལས་ལ་བཟང་ངན་འབྱུང་།། བཟང་ངན་དེ་ལས་བདེ་སྡུག་འབྱུང་།།（2）ཞེས་གསུངས་པ་ལྟར།ལས་ཀྱི་བཟང་ངན་དང་ལེགས་ཉེས་དོན་ལ་ནང་གི་ཀུན་སློང་ལ་ལྟོས་པ་ཅན་ཡིན་ཞིང་།སྒོ་གསུམ་གྱི་ལས་དུག་གསུམ་གྱིས་མ་བསླད་པར་བཟང་པོ་བྱས་ན་འབྲས་བུ་བདེ་བ་འཐོབ་རྒྱུ་དང་།དུག་གསུམ་གྱིས་བསྐྱེད་པའི་ལས་ངན་པ་བྱས་ན་འབྲས་བུ་སྡུག་བསྔལ་མྱོང་རྒྱུ་གཏན་འཁེལ་ཡིན་པར་ཐག་བཅད་ཡོད་པས།རང་ཕྱོགས་ལ་ཆགས་པ་དང་།གཞན་ཕྱོགས་ལ་སྡང་བ།ལས་འབྲས་ལ་རྨོངས་པ་བཅས་ལས་བྱུང་བའི་སྒེར་སེམས་ཀྱི་བསམ་བློ་དོར་ནས་དྲང་པོ་དྲང་བཞག་བྱེད་དགོས་པ་བསྟན་ཡོད།

སྤྱི་ཚོགས་འཚོ་བ་ནི་རྙོག་འཛིང་ཆེ་ཞིང་།བརྒྱུད་རིམ་ནི་འཁྲུག་ཆ་དོད་པ་ཞིག་ཡིན་པས།རྣམ་ཀུན་མི་རྣམས་ཀྱིས་ལས་བཟང་བྱས་ཚད་ལ་འབྲས་བུ་བཟང་པོ་དང་།ལས་ངན་བྱས་ཚད་ལ་འབྲས་བུ་ངན་པ་བལྟས་བལྟས་རིག་རིག་ཏུ་མྱོང་བ་ཅུང་མཐོང་དཀོན་ཏེ།དངོས་གནས་དེ་ལྟར་འབྱུང་ན་འབྲས་བུ་བཟང་པོ་ལ་ཡིད་གཡོས་ཏེ་མི་རྣམས་སྡིག་པ་ལ་འཛེམ་ངེས་སོ།།དེ་ལས་འདས་ཏེ།རྣམ་ཀུན་མི་ཁ་ཅིག་རྫུན་དང་གཡོ་སྒྱུ་སྲོག་འཕྲོག་གི་ལས་བྱས་ཀྱང་སྐྱིད་པོ་རྒྱགས་པོས་འཚོ་བ་དང་།རྟག་ཏུ་བདེན་པ་བདེན་ཐུབ་དང་ལྷག་བསམ་རྣམ་དག་བྱས་ཀྱང་ཚེ་ཐུང་ནད་མང་གིས་གདུངས་ནས་མནར་བ་མང་པོ་ཡོད།དེས་མི་རྣམས་ལ་དགེ་སྡིག་དང་བདེ་སྡུག་ལ་དམིགས་བསལ་གྱི་འབྲེལ་བ་མེད་པར་བསམས་ནས་དགེ་སྒྲུབ་སྡིག་སྤོང་བྱེད་པ་དམིགས་འབེན་དང་འདུ་ཤེས་ལ་འཆང་བའི་གནོད་བྱེད་དུ་གྱུར་ཡོད།ཚུལ་འདི་ལ་དགོངས་ཏེ་ལས་འབྲས་ཀྱི་སྣང་ཚུལ་ལ་ལས་ངེས་པ་དང་།འཕེལ་ཆེ་བ།མ་བྱས་པ་དང་མི་འཕྲད་པ།བྱས་པ་ཆུད་མི་ཟ་བ་རྣམས་གསུངས་ཏེ།ལས་བཟང་པོ་ལ་འབྲས་བུ་ངན་པ་དང་།ལས་ངན་པ་ལ་འབྲས་བུ་བཟང་པོ་མྱོང་བ་བཀག་ནས་རྫུན་དང་གཡོ་སྒྱུ་བྱས་ཀྱང་སྐྱིད་པོས་འཚོ་བ་ལས་ངན་ལ་འབྲས་བཟང་སྨིན་པ་མ་ཡིན་ཏེ།སྐྱིད་པོ་བྱུང་བ་ནི་སྐྱེ་བ་སྔོན་མར་བསགས་པའི་ལས་བཟང་གི་འབྲས་བུ་ད་ལྟར་དུས་ལ་བབས་ནས་སྨིན་པ་ཡིན་ཞིང་།རྫུན་དང་གཡོ་སྒྱུའི་རྣམ་སྨིན་གྱི་འབྲས་བུ་ངན་པ་ཕྱི་མར་སྡུག་བསྔལ་མྱོང་དགོས་པ་གཏན་འཁེལ་དུ་བྱས་ཡོད་ལ།དགེ་བ་ལ་གོམས་ན་དེ་སྤྲོ་བ་བསླེབ་ངེས་ཤིང་།སྡིག་པ་ལ་ཞུགས་ན་ངན་ཞེན་གྱི་ལེ་ལོ་འཕེལ་བ་བཤད་ཡོད་དེ།མི་ཁ་ཅིག་རྟག་ཏུ་རྫུན་ཤོད་པ་ལ་ངན་གོམས་བྱུང་ནས་རྫུན་ཤོད་པ་ངོ་ཚར་མི་འཛིན་པ་ལྟ་བུས་མཚོན་ནོ།།གཞན་ཡང་རང་གིས་ལས་དེ་བསགས་མེད་ན་འབྲས་བུ་དེ་རང་ལ་སྨིན་མི་སྲིད་ཅིང་།སོ་སོས་བྱས་པའི་ལས་ཀྱི་འབྲས་བུ་དེ་སོ་སོས་མ་མྱོང་བར་ཐར་ཐབས་མེད་པས།འཕྲལ་གྱི་ཁེ་ཕན་གྱི་ཆེད་དུ་མ་རུངས་ཁོག་བཅངས་ཀྱི་ལས་ཀ་བྱས་ཏེ་རྒྱལ་ཁྲིམས་ཀྱི་རྒྱ་ལས་འདའ་ཐུབ་ཀྱང་།ལས་འབྲས་ཀྱི་ཁྲིམས་ལ་གཡོལ་དུ་མེད་པར་རྣམ་སྨིན་གྱི་འབྲས་བུ་མྱོང་དགོས་པ་ཡིན་པས།ད་ལྟའི་བདེ་སྡུག་ལ་གནོང་མེད་འགྱོད་མེད་ཀྱིས་བདག་གིར་བྱས་ནས་ཕྱིན་ཆད་དགེ་སྡིག་གི་བླང་དོར་ལ་འདུ་ཤེས་བསྐྱེད་དགོས་པར་གདམས་ཡོད།

གཉིས།ཉོན་མོངས་སྤོང་བ་ཉམས་ལེན་གྱི་གནད་དུ་འཛིན་དགོས་པར་བསྟན་པ།

སྐྱེས་བུ་འབྲིང་ནི་འཁོར་བའི་བྱ་གཞག་ལ་བློ་ལོག་པ་སྔོན་དུ་སོང་ནས།རང་ཁོ་ནའི་དོན་དུ་ཐར་པ་དོན་གཉེར་བྱེད་པའི་གང་ཟག་ལ་གོ་བས།འཁོར་བ་ལ་ཞེན་ན་ངེས་འབྱུང་མིན་ཞེས་རང་དོན་དུ་འཁོར་བའི་ཕུན་ཚོགས་ལ་ཞེན་པ་གཏིང་ནས་ལོག་པའི་ངེས་འབྱུང་གི་བསམ་བློས་སྡིག་པ་ལས་དུས་ཐམས་ཅད་ལོག་པ་ལ་འབད་པ་ཡིན་པས།ཀུན་སྤྱོད་ཀྱི་ལྟ་བའམ་བློ་སྦྱོང་ལ་དབང་མངོན་ལས་འདས་པའི་ཡུལ་ལྐོག་གྱུར་བདེན་པ་བཞི་དང་རྟེན་འབྲེལ་ཡན་ལག་བཅུ་གཉིས་སུ་“ཉོན་མོངས་ནི་ལས་ཀྱིའང་རྩ་བ་ཡིན་ཏེ།སྲིད་པར་སྐྱེ་བ་འཕེན་བྱེད་ཀྱི་ལས་ཀུན་ནས་སློང་མཁན་ཡང་མ་རིག་པ་སོགས་ཉོན་མོངས་ཡིན་ལ།ལས་དེར་གསོས་འདེབས་མཁན་ཡང་སྲེད་ལེན་གྱི་ཉོན་མོངས་ཡིན་པས་ལས་གསར་གསོག་དང་ཕྱིས་ནུས་པ་མཐུ་ཅན་དུ་འགྱུར་བ་ཐམས་ཅད་ཉོན་མོངས་པར་རག་ལས་སོ།།”（3）ཞེས་སེམས་རྒྱུད་མ་ཞི་བར་བྱེད་པ་ནི་སྡུག་བསྔལ་ཡིན་པ་དང་།དེ་བྱེད་པའི་གཙོ་བོ་ཉོན་མོངས་ཡིན་པར་གཞུང་ལུགས་ཕྱོགས་ཀྱི་མི་ཆོས་ཀྱིས་གཏན་ལ་ཕབ་ཡོད།

དང་པོ་བདེན་པ་བཞི་ལ་མཚོན་ན།སྡུག་བསྔལ་བརྒྱད་སོགས་མི་ཚེའི་གནད་དོན་ལ་གཞིགས་ནས་མི་ཚེ་ནི་སྡུག་བསྔལ་འབའ་ཞིག་ཡིན་པའི་གནས་ལུགས་ལ་གསལ་བཤད་བྱས་ཡོད་ཅིང་།ཀུན་འབྱུང་བདེན་པར་ཟག་བཅས་ཉེར་ལེན་གྱི་ཕུང་པོ་འདི་ཉིད་སྡུག་བསྔལ་གྱི་རང་བཞིན་དུ་གྱུར་པ་ལ་རྒྱུ་ཡོད་མེད་དང་ཡོད་ན་གང་ཞིག་ཡིན་མིན་ནས་འཕྲོས་ཏེ་ལས་ནི་སྡུག་བསྔལ་གྱི་ས་བོན་དང་།ཉོན་མོངས་ནི་དེ་འགྲུབ་བྱེད་ཀྱི་རྐྱེན་ཡིན་པས་ལས་ཉོན་གཉིས་ལ་བརྟེན་ནས་འཁོར་བ་རུ་འཁོར་ཚུལ་གསུངས་ཡོད།སྡུག་བསྔལ་གྱི་རྒྱུ་ལ་རྩད་གཅོད་བྱེད་པ་སྡུག་བསྔལ་གྱི་རྒྱུན་གཅོད་པའི་ཆེད་དུ་ཡིན་ལ།འགོག་བདེན་ཟེར་བ་དོན་དུ་སྡུག་བསྔལ་གྱི་རྒྱུན་བཀག་པའི་ཆ་སྡུག་བསྔལ་སྤངས་པའི་སྤངས་པ་ལ་གོ་སྟེ་འཐོབ་བྱར་ཉན་ཐོས་བྱང་ཆུབ་དང་རང་རྒྱལ་བྱང་ཆུབ་གཉིས་ཡོད།དེ་ལྟར་མི་ཚེ་ནི་སྡུག་བསྔལ་གྱི་རང་བཞིན་ལས་མ་འདས་པ་དང་།མིའི་གཉུག་གཤིས་ནི་བདེ་བ་འདོད་ཅིང་སྡུག་བསྔལ་མི་འདོད་པ་ཡིན་ན།དཀའ་ཐུབ་སྤྱད་ནས་སྡུག་བསྔལ་སྤོང་བ་དང་བདེ་བ་ལ་འབད་པ་ནི་མི་ཚེའི་དམིགས་ཡུལ་ཡིན་པས།ཐོག་མར་སྡུག་བསྔལ་སྡུག་བསྔལ་དུ་ཤེས་པར་བྱས།དེ་ནས་དེའི་རྩ་བ་གང་ལ་ཐུག་པ་རྩད་བཅད།དེ་ནས་སྡུག་བསྔལ་མེད་པར་བྱེད་པ་ལ་དེའི་རྒྱུ་ཉོན་མོངས་སྤངས་ནས་ཐར་པ་འཐོབ་དགོས་པ་དང་།དེ་འཐོབ་པ་ལ་ལམ་གང་ཞིག་བརྒྱུད་དགོས་པའི་རིགས་པ་དང་ལྡན་པར་བསྟན་ཏོ།།

གཉིས་པ་རྟེན་འབྲེལ་ཡན་ལག་བཅུ་གཉིས་ལ་མཚོན་ན། མི་ཚེའི་བྱུང་རིམ་གྱི་གནད་དོན་རྣམས་རྒྱུ་འབྲས་ཀྱི་ལྟ་བའི་རྨང་གཞི་ལ་སྦྱར་ནས་སྟོན་པ་ཡིན་ཞིང་།ཐོག་མའི་དུས་སྐབས་ཀྱི་ནང་པ་རྣམས་ཀྱིས་སྡུག་བསྔལ་དབྱེ་ཞིབ་མཛད་པའི་བརྒྱུད་རིམ་གྱི་ཁྲོད་ནས་རྟེན་འབྲེལ་ཡན་ལག་གི་ལྟ་གྲུབ་གསར་གཏོད་མཛད་པ་ལུགས་སུ་འབྱུང་བའི་རྟེན་ཅིང་འབྲེལ་བར་འབྱུང་བར་མ་རིག་པ་པའི་རྐྱེན་གྱིས་འདུ་བྱེད།འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་གཟུགས།མིང་གཟུགས་ཀྱི་རྐྱེན་གྱིས་སྐྱེ་མཆེད་དྲུག།སྐྱེ་མཆེད་དྲུག་གི་རྐྱེན་གྱིས་རེག་པ།རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ།སྲེད་པའི་རྐྱེན་གྱིས་ལེན་པ།ལེན་པའི་རྐྱེན་གྱིས་སྲིད་པ།སྲིད་པའི་རྐྱེན་གྱིས་སྐྱེ་བ།སྐྱེ་བའི་རྐྱེན་གྱིས་རྒ་ཤི་བྱུང་སྟེ།མ་རིག་པ་སོགས་ཡན་ལག་བཅུ་གཉིས་ལ་བརྟེན་ནས་འཁོར་བའི་སྡུག་བསྔལ་དཔག་ཏུ་མེད་པ་འབྱུང་བའི་ཚུལ་ལ་ནང་གི་རྒྱུ་འབྲས་ཀྱི་རྣམ་གཞག་སྡུག་ཀུན་གཉིས་ལ་བརྟགས་ཏེ་ཀུན་ནས་ཉོན་མོངས་ཕྱོགས་ཀྱི་རྟེན་འབྲེལ་གསུངས་པ་དང་།རྣམ་བྱང་ཕྱོགས་ཀྱི་རྒྱུ་འབྲས་འགོག་ལམ་བདེན་པ་བརྟག་པར་བཞེད་ནས་རྒ་ཤི་ནས་མ་རིག་པའི་བར་ལུགས་ལྡོག་ཏུ་གསུང་པ་ལས་ཤེས་སླའོ།།

གསུམ། གཞན་དོན་གྱི་བྱ་བ་ཁུར་དུ་འཁྱེར་བའི་བསམ་པ་ཡོད་དགོས་པར་བསྟན་པ།

ནུབ་ཕྱོགས་པ་ཚོས། “དཔྱོད་ཤེས་སུ་གྱུར་པའི་སྲོག་ལྡན་རེ་རེས།རང་གི་རིགས་མཐུན་ཡིད་ཅན་རྣམས་ལ་བཅངས་པའི་བྱམས་དང་སྙིང་རྗེ་དོན་ལ་སྤྱི་སྒེར་གཉིས་ཀྱི་བདེ་ཐབས་སྐྱིད་ཐབས་ཀྱི་རྩ་བ་རེད་ལ།དེ་ལྟའི་བྱམས་དང་སྙིང་རྗེ་རིགས་མཐུན་ཡིད་ཅན་སྤྱི་ལ་མེད་ཐབས་མེད་པའི་རྐྱེན་གྱིས།ལུས་ཅན་ཐུན་མོང་གི་ཕན་བདེ་དོན་ལ་མཐོ་མཐར་གྱུར་པའི་སྤྱི་པའི་བསྲུང་ཁྲིམས”（4）སུ་བཤད་པ་དང་འདྲ་བར།འུ་ཅག་གི་སྐྱེས་བུ་ཆེན་པོའི་མི་ཆོས་ཀྱི་ལྟ་བས་སྙིང་རྗེ་ཆེན་པོའི་གཞན་དབང་དུ་གྱུར་པའི་སྒོ་ནས་སེམས་ཅན་གཞན་རྒྱུད་ལ་སངས་རྒྱས་འཐོབ་པའི་ཆེད་དུ་རྣམ་མཁྱེན་དོན་དུ་གཉེར་བ་ནི་གཞན་ཕན་དང་ལྷག་བསམ་ལ་རྒྱབ་གཉེར་གྱིས་སྒྲུབ་ངག་བྱིན་ཏེ།ཀུན་སྤྱོད་ཀྱི་བླང་བྱ་དང་མཐུན་པའི་མི་ཆོས་ཀྱི་བློ་སྦྱོང་ལ་ཡར་སྐུལ་བྱེད་པ་ཡིན་ནོ།།

རྗེ་བཙུན་གྲགས་པ་རྒྱལ་མཚན་གྱིས།“བདག་གཅིག་པུ་ཐར་བས་ཕན་རྒྱུ་མེད།།ཁམས་གསུམ་གྱི་སེམས་ཅན་ཕ་མ་ཡིན།།ཕ་མ་སྡུག་བསྔལ་གྱི་གསེབ་ཏུ་བཞག།བདག་བདེ་བར་འདོད་པ་ཐེ་ལེ་ལེ།།”（5）ཞེས་གསུངས་ཏེ་ཉན་རང་གིས་མཚོན་པའི་སྐྱེས་བུ་འབྲིང་གི་འཐོབ་བྱའི་ཆོས་ལ་རང་དོན་མ་རྫོགས་ཤིང་གཞན་དོན་མི་ནུས་པ།རྫོགས་བྱང་གི་གེགས་བྱེད་པའི་སྐྱོན་བསྟན་ནས་གཞན་དོན་དོན་གཉེར་གྱི་མི་ཆོས་ལྟ་བ་སྐྱེས་བུ་རང་ལྡོག་གི་ཚེ་ཡི་སྙིང་པོར་མངོན་དུ་བྱེད་པ་ལ་རྒྱུ་འབྲས་མན་ངག་བདུན་གྱི་སྒོ་ནས་དང་།བདག་གཞན་མཉམ་བརྗེའི་སྒོ་ནས་སེམས་བསྐྱེད་ཚུལ་དང་འདྲ་བར།མན་ངག་འདིར་བྱམས་པ་དང་སྙིང་རྗེ་གཉེན་ལ་སྒོམ་པ་དང་།བར་མ་ལ་སྒོམ་པ་དང་།དགྲ་ལ་སྒོམ་པ་དང་།སེམས་ཅན་ཐམས་ཅད་ལ་སྒོམ་ཚུལ་བཤད་ཡོད་ཅིང་།བྱམས་པ་དེ་ཡང་སྙིང་རྗེ་ལ་བསམས་ན་ཞར་ལ་འབྱུང་བ་ཡིན་ལ་སྙིང་རྗེ་ཆེན་པོས་ཡིད་བསྐྱོད་ནས་སེམས་ཅན་ཐམས་ཅད་འཁོར་བ་ལས་འདོན་པའི་ཁུར་འཁྱེར་བར་དམ་འཆའ་བར་འགྱུར་བས་གཙོ་བོ་སྙིང་རྗེར་དྲིལ་ཡོད་དམ་སྙམ་མོ།།

དེ་ཡང་མི་རྣམས་རྟག་ཏུ་ཉོན་མོངས་པའི་དབང་གིས་སེམས་སྙོམས་པར་བསྒྲུབ་མི་ཐུབ་པར་སེམས་ཅན་ཁ་ཅིག་ལ་ཆགས་པ་དང་།ཁ་ཅིག་ལ་སྡང་བའི་ཕྱོགས་རིས་སུ་གཅོད་པ་ཡིན་ལ་བྱམས་སྙིང་རྗེ་ཕྱོགས་རིས་ཅན་དུ་འགྲོ་བ་ལས་ཐམས་ཅད་ལ་བཏང་སྙོམས་བྱེད་མི་ཐུབ་སྟེ།ཟག་བཅས་ཀྱི་དངོས་པོ་ཡིད་དུ་འོང་བ་མཐོང་ནས་དོན་དུ་གཉེར་བ་ཡིན་པས།མན་ངག་འདིའི་སྙིང་རྗེའི་ཉམས་ལེན་ལའང་སྔོན་དུ་སེམས་ཅན་དེ་ཡིད་དུ་འོང་ཞིང་གཅེས་ཤིང་ཕངས་པའི་རྣམ་པ་ཅན་དུ་སྒྲུབ་པའི་བརྒྱུད་རིམ་ཞིག་བསྟན་ཡོད།དུས་རྒྱུན་འཚོ་བའི་ཁྲོད་མི་རྣམས་རྟག་ཏུ་གཉེན་ལ་སྡུག་བསྔལ་བྱུང་ན་མི་བཟོད་པ་དང་།དགྲ་ལ་སྡུག་བསྔལ་བྱུང་ན་དགའ་ཞིང་།དགྲ་གཉེན་དུ་མ་གཏོགས་བའི་བར་མ་རྣམས་ལ་ཡལ་བར་འདོར་བའི་བཏང་སྙོམས་ཀྱི་བློ་སྐྱེ་བ་ནི་གཉེན་ལ་སྙིང་དུ་སྡུག་པ་ཡོད་པས་ཡིན་ལ།དགྲ་རྣམས་ཡིད་དུ་མི་འོང་བས་སྡུག་བསྔལ་བྱུང་བར་མཐོང་ན་བྲལ་འདོད་ཀྱི་བློ་མི་སྐྱེ་བ་མ་ཟད།དེ་ལས་ཆེ་བ་དང་དེ་དང་མི་འབྲལ་ན་ཅི་མི་རུང་བར་སྙམ་ཞིང་།དགྲ་གཉེན་བར་མ་ལ་ནི་ཡིད་དུ་འོང་མི་འོང་གི་རྣམ་དབྱེ་མེད་པས་དེའི་སྡུག་བསྔལ་ལ་མི་བཟོད་པ་དང་དགའ་བ་གང་ཡང་མེད་དོ།།མདོར་ན་བྱམས་པ་དང་སྙིང་རྗེ་གཉེན་ལ་སྒོམ་པ་དང་།དགྲ་ལ་སྒོམ་པ་དང་།སེམས་ཅན་ཐམས་ཅད་ལ་རིམ་པས་སྒོམ་པ་ནི་ཡིད་དུ་འོང་བ་སྐྱེ་བའི་ཆེད་དུ་ཡིན་ཞིང་།ཚེ་སྟོད་དུ་དགྲ་ཡིན་ཡང་ཚེ་སྨད་དུ་གྲོགས་སུ་འགྱུར་བ་དང་དེ་རིང་གི་གཅེས་པའི་གྲོགས་ཀྱང་སང་ཉིན་གྱི་དུས་སུ་དགྲ་རུ་འགྱུར་བ་ཡང་སྲིད་པ་སོགས་དགྲ་གཉེན་ཐམས་ཅད་མྱུར་དུ་འགྱུར་བའི་ཚུལ་བསམས་ཏེ་ཁྲོ་ཆགས་གཉིས་དང་བྲལ་བའི་སེམས་སྙོམས་ལ་ཞུགས་ཏེ་དགེ་བའི་ཡོན་ཏན་གོང་འཕེལ་དུ་གཏོང་བར་རང་ཉིད་ཀྱི་སེམས་འདུལ་སྦྱོང་བྱེད་དགོས་པ་བསྟན་ཡོད།

བཞི། སེམས་རང་བཞིན་དུ་གྲུབ་པའི་བདེན་པར་མེད་པ་བསྟན་པ།

འཕགས་པ་ཀླུ་སྒྲུབ་ཀྱིས།“ཇི་སྲིད་ཕུང་པོར་འཛིན་ཡོད་པར།།དེ་སྲིད་དེ་ལ་ངར་འཛིན་ཡོད།།ངར་འཛིན་ཡོད་ན་ཡང་ལས་ཏེ།། དེ་ལས་ཡང་ནི་སྐྱེ་བ་ཡིན།།”（6）ཞེས་མི་རྣམས་ལ་བདག་ཏུ་འཛིན་པའི་འདུ་ཤེས་ནི་ལྷན་སྐྱེས་སུ་མངའ་སྟེ།རྟག་ཏུ་ལུས་སེམས་གང་རུང་དུ་བདག་ནི་གཞན་ལ་རག་མ་ལས་པའི་རང་བཞིན་དང་ངོ་བོས་གྲུབ་པར་འདོད་དེ།བདག་ཏུ་བཟུང་ནས་རང་ལ་ཆགས་པ་དང་།གཞན་དུ་བཅད་ནས་སྡང་བར་བྱེད་པ་སོགས་ཉོན་མོངས་པའི་གཞན་དབང་དུ་གྱུར་ནས་སྡུག་བསྔལ་གྱིས་འཁོར་བར་འཁོར་བཞིན་ཡོད་ལ།འཁོར་བའི་སྡུག་བསྔལ་ལས་གྲོལ་བར་བདག་འཛིན་བདེན་སྟོང་དུ་རྟོགས་དགོས་པས།འཛིན་པ་བྱུང་ན་ལྟ་བ་མིན་ཞེས་བདག་འཛིན་ནི་ཉེས་སྐྱོན་ཐམས་ཅད་ཀྱི་རྩ་བ་ཡིན་པ་དང་།སྡུག་བསྔལ་རྒྱུ་དང་བཅས་པ་སྤོང་བ་ལ་བདག་འཛིན་གཅོད་པ་ནི་ཁ་ཚ་དགོས་གཏུགས་སུ་གྱུར་ཡོད་དོ།།

ཞེན་པ་བཞི་བྲལ་ལྟར་ན། བདག་འཛིན་གྱི་སེམས་དེ་ཕྱིན་ཅི་ལོག་པའི་འཁྲུལ་ཤེས་ཉོན་མོངས་མ་རིག་པའི་དབང་གིས་སྣང་བའི་སྣང་བ་རྫུན་པ་ཡང་དག་དོན་ལ་མེད་པ་ཞིག་ཡིན་པར་ཐག་བཅད་དེ་བདེན་འཛིན་གྱི་སྤྲོས་པ་གཅོད་ཚུལ་ལ།དང་ཐོག་རང་ཉིད་ཀྱི་ཕུང་པོ་ལྔ་པོ་བདེན་པར་འཛིན་པའི་བདེན་འཛིན་ངོས་བཟུང་བ་དང་།དེ་ནས་ཕུང་པོ་ལྔ་བོ་བདེན་པར་གྲུབ་ན་རྒྱུ་རྐྱེན་གང་ལའང་རག་མ་ལས་པར་རང་གི་སྡོད་ལུགས་ཀྱི་ངོས་ནས་བདེན་པར་གྲུབ་དགོས་ཀྱང་།རྒྱུ་རྐྱེན་ལ་ལྟོས་པ་ཁོ་ནར་མཐོང་སྟེ་བདེན་པར་མ་གྲུབ་པའི་ཆོས་ལ་ངེས་པ་རྙེད་པར་བྱེད་པ་དང་།རྣམ་རྟོག་ངན་པ་ཐམས་ཅད་རང་བཞིན་གྱིས་བྲོས་ཏེ་སྦྲུལ་གྱི་མདུད་པ་གྲོལ་བ་ལྟར་བདེན་འཛིན་རང་ཞིར་འགྱུར་བར་འབད་པ་དང་།ཡུན་རིང་བསྒོམས་ན་ཆོས་ཐམས་ཅད་བདེན་མེད་དུ་རྟོགས་ཐུབ་པར་བཤད་པ་མ་ཟད།བདག་ཅེས་པའི་ཐ་སྙད་འདོགས་ས་ཐམས་ཅད་རིགས་པས་བཀག་ན་ལས་འབྲས་ཀྱི་རྟེན་མེད་པར་གྱུར་ཏེ་རྟག་ཆད་ཀྱི་མཐར་ལྷུང་བར་དོགས་ནས་བདེན་མེད་ཀྱི་སྤྲོས་པ་སྟེ་ཆོས་ཐམས་ཅད་བདེན་མེད་ཡིན་སྙམ་པའི་རྟོག་པ་དེ་ཡང་གཅོད་པར་བྱེད་དེ།རྟེན་འབྲེལ་གྱི་གནད་ཤེས་པའི་རྨང་གཞི་ལ་བརྟེན་ནས་ཆོས་ཐམས་ཅད་བདེན་མེད་དུ་རྟོགས་པའི་ལྟ་བ་ལ་ངེས་ཤེས་བསྐྱེད་ནས་བདེན་མེད་ཀྱི་ཞེན་པ་གཏོང་ཞིང་།གནས་ལུགས་སྟོང་པ་ཉིད་དེ་གཉིས་འཛིན་གང་གི་ཡང་སྤྱོད་ཚུལ་དུ་མེད་པའི་འཛིན་མེད་ཀྱི་ངང་དུ་འཇོག་པའི་གསལ་སྟོང་འཛིན་མེད་ཀྱི་ལྟ་བ་བསྟན་ཡོད།

དེ་ཡང་དགེ་སྡིག་གི་རྣམ་གཞག་གཙོ་བོ་ནང་གི་སྐུལ་སློང་སེམས་པ་ལ་རག་ལས་པས།མན་ངག་འདིའི་ལུགས་ལ་སེམས་ཀྱི་གནས་ལུགས་རྟོགས་པར་བྱེད་པ་འཁོར་འདས་འབྱེར་མེད་ཀྱི་ལྟ་བ་དེ་ཉམས་ལེན་གྱི་གནད་དུ་གསུངས་ཡོད་དེ།སེམས་ལ་འཆར་སྣང་གང་བྱུང་བ་ཚང་མ་འཁྲུལ་པ་འབའ་ཞིག་ཡིན་ཏེ།གནས་ཚུལ་གྱི་ངོ་བོ་མ་མཐོང་བའི་འཆར་སྣང་རྫུན་མ་ཡིན་ལ།དེའི་ངོ་བོ་ནི་གཅིག་ལས་མེད་པ་སྟེ།རྒྱུ་དང་རྐྱེན་ལ་བརྟེན་ནས་བྱུང་བ་ལས་རང་བཞིན་གྱིས་གྲུབ་པ་མ་ཡིན་པར་ཐག་བཅད་ནས་དེ་ལྟ་བུའི་རང་སེམས་ཀྱི་ངོ་བོ་ངོ་མ་མཐོང་བ་ཡིན་ན་སྣང་བ་བྱུང་ཚད་ཚང་མ་འཁོར་འདས་དབྱེར་མེད་ཀྱི་རྣམ་འགྱུར་ཤ་སྟག་ཡིན་པ་ར་འཕྲོད་དེ་སེམས་ཀྱི་སྟོང་པ་ཉིད་རྟོགས་ཐུབ་པར་བཤད་དོ།།