【ནང་དོན་གནད་བསྡུས 】འཛིན་བདག་དགེ་རྒན་ནི་འཛིན་གྲྭ་ཞིག་གི་ཐུན་མོང་སྒྲིག་འཛུགས་པ་དང་། སློབ་གསོ་པ། སྣེ་ཁྲིད་པ་སྟེ་དེ་ནི་སློབ་གྲྭ་ཡོངས་ཀྱི་རམ་འདེགས་པ་དང་རྐང་འཛིན་པ་ཡིན་ལ། སློབ་གྲྭ་དང་ཁྱིམ་ཚང་།སྤྱི་ཚོགས་གསུམ་བར་གྱི་མཐུན་སྦྱོར་པ་ཡང་ཡིན་པས།དེས་སློབ་མ་རྣམས་ཀྱིས་རང་གི་སྤྱོད་ལམ་ལ་བརྡར་ཤ་གཅོད་ནུས་པ་དང་།རང་གིས་རང་ལ་སློབ་གསོ་གཏོང་བའི་ནུས་པ་སྐྱེད་སྲིང་བྱེད་པ་སོགས་ཕྱོགས་ཡོངས་ནས་སློབ་མའི་སེམས་ཁམས་དང་མཐུན་པའི་སློབ་གསོའི་སྤུས་ཚད་མཐོར་འདེགས་གཏོང་བའི་ལས་འགན་འཁུར་གྱིན་ཡོད།འཛིན་གྲྭ་ཞིག་གི་སློབ་སྦྱོང་གི་གནས་ཚུལ་དང་འཛིན་གྲྭའི་རྣམ་པ་སོགས་ཐད་ཀར་འཛིན་བདག་དགེ་རྒན་གྱི་བྱ་བར་རག་ལས་ཡོད་པས།འདིར་འཛིན་བདག་དགེ་རྒན་ཞིག་གི་ཅི་ལྟར་སློབ་མར་མཛུབ་སྟོན་གནང་དགོས་པའི་སྐོར་རགས་ཙམ་གླེང་བར་བྱ།
【བརྡ་ཆད་གཙོ་བོ】འཛིན་བདག རྐང་འཛིན།མཛུབ་སྟོན།
གཅིག སློབ་མ་རང་གི་དགའ་ཕྱོགས་དང་ཁྱིམ་ཚང་ཁོར་ཡུག་གཞིར་འཛིན་དགོས།
སློབ་མ་རེ་རེའི་དགའ་ཕྱོགས་དང་བསམ་ཚུལ་མི་འདྲ་བ་དང་།དགེ་རྒན་ལ་འབྲེལ་འདྲིས་ཟབ་མོ་བྱེད་ཐུབ་མིན་གྱི་རྐྱེན་གྱིས་ཁོ་ཚོའི་སློབ་སྦྱོང་གི་ཆུ་ཚད་ལའང་རབ་འབྲིང་ཐ་གསུམ་གྱི་ཁྱད་པར་ཡོད་མོད།འོན་ཀྱང་འཛིན་བདག་དགེ་རྒན་གྱིས་སོ་སོའི་དགའ་ཕྱོགས་ལ་གཞི་བཙུགས་ཏེ།སློབ་སྦྱོང་ཞན་པའི་སློབ་ཕྲུག་དག་ལས་ལ་ལ་གླུ་དབྱངས་ལེན་པར་དགའ་བ་དང་།ལ་ལ་རི་མོ་འབྲི་བར་དགའ་བ།ལ་ལ་ཞབས་བྲོ་འཁྲབ་པར་དགའ་བས།དེ་དག་བསྟོད་བསྔགས་ཀྱི་རྨང་གཞི་བྱས་ཏེ་སྐུལ་འདེད་བྱས་ན་བསམ་བློའི་གོ་རྟོགས་ཇེ་མཐོར་གཏོང་བར་ནུས་པ་ཐོན་ངེས།དེ་ལས་ཁྱད་དུ་འཕགས་པ་ཞིག་སྟེ་ཡང་ལ་ལ་ཀུ་རེ་དང་དགོད་གཏམ་བཤད་རྒྱུར་ཧ་ཅང་དགའ་བ་རེད། དེ་ཡིས་ཁོས་དཀའ་སྡུག་མང་པོ་ཞིག་རྒྱབ་ཏུ་འཁུར་ཐུབ་པའི་སྙིང་སྟོབས་ཤིག་མངོན་གསལ་དུ་མཚོན་ཐུབ་པས་འཛིན་བདག་གིས་ཡིད་ཆེས་དང་གདེང་འཇོག་ཚད་མེད་བྱས་ན།སློབ་མའི་སློབ་སྦྱོང་གི་ཆུ་ཚད་རིམ་བཞིན་འཕར་བར་ཕན།
སློབ་མ་སོ་སོའི་ཁྱིམ་ཚང་དང་ཁོར་ཡུག་གི་གནས་ཚུལ་མི་འདྲ་བས་ཁོ་ཚོའི་སེམས་ཁམས་དང་རང་གཤིས་ལ་ཐུན་མོང་མ་ཡིན་པའི་ཁྱད་ཆོས་རེ་ཡོད།དེ་བས་འཛིན་བདག་དགེ་རྒན་གྱིས་ཁྱད་ཆོས་མི་འདྲ་བ་དེ་དག་ལ་དམིགས་ནས་སྐབས་བསྟུན་སློབ་ཁྲིད་དམ་སློབ་གསོ་བྱེད་འོས་པ་ལས།རང་དགར་སློབ་མར་སྐྱོན་བརྗོད་དང་གཅར་རྡུང་བྱེད་མི་རུང་།སློབ་མ་སྒེར་གྱི་གནད་དོན་ལ་སློབ་ཁང་ངམ་སློབ་ཁྲིད་ཁྲོད་དུ་སྐྱོན་བརྗོད་དྲག་པོ་མི་བྱེད་པར།བྱ་བའི་མགོ་ཡལ་རྗེས་གཞི་ནས་གཅིག་པུར་ཁ་བརྡ་སློབ་གསོ་བྱས་པ་བརྒྱུད་ནས་རང་སྐྱོན་ངོས་ཟིན་དུ་འཇུག་དགོས་པ་དང་།སློབ་ཁང་ངམ་ཡང་ན་སློབ་གྲྭའི་སྒྲིག་ལམ་དང་འགལ་རྗེས་དེའི་འཕྲལ་རང་སྐྱོན་ངོས་ཟིན་བྱུང་བའི་སློབ་མར་གུ་ཡངས་ཀྱི་བྱ་ཐབས་སྤྱོད་པ་ལས་སྐྱོན་བརྗོད་མ་གནང་ན་རང་བཀུར་གྱི་བསམ་བློར་གནོད་པ་མི་ཐེབས་པར་མ་ཟད།དགེ་རྒན་ལ་ཡིད་ཆེས་བྱེད་པ་དང་དུས་ཚོད་མང་པོའང་གྲོན་ཆུང་བྱེད་ཐུབ་པ་རེད།དེ་ལས་གཞན་ཉེས་པ་ཚབས་ཆེ་ཞིང་ཨུ་ཚུགས་ཆེ་བའི་སློབ་མར་སྐྱོན་བརྗོད་ནན་མོ་བྱས་ཏེ་རང་སྐྱོན་ངོས་འཛིན་ཡག་པོ་བྱེད་དུ་འཇུག་དགོས།
གཉིས།སློབ་མའི་བསམ་བློ་དང་སྦྱངས་འབྲས་ལ་དོ་ཁུར་བྱེད་པ་ཤིན་ཏུ་གལ།
འཛིན་བདག་དགེ་རྒན་གྱི་སློབ་གསོའི་འོག་ཏུ་སྦྱངས་འབྲས་ཞན་པའི་སློབ་མའི་རང་དམན་བསམ་བློ་འདོར་བ་དང་ཡིད་ཆེས་བསམ་བློ་འཛུགས་དགོས།སྦྱངས་འབྲས་ཞན་པའི་སློབ་མ་མང་པོ་ཞིག་གི་རང་གིས་ཕམ་ཁ་དེར་སྣང་དོགས་ཅི་ཡང་མེད་པ་ལྟར་གནས་མོད།རང་གི་ལྟ་ཚུལ་ལྟར་རེ་བ་འདོན་པའི་སྙིང་སྟོབས་གཏན་ནས་མེད་པས་དོན་དངོས་སུ་ཁོ་ཚོའི་སེམས་སུ་རང་དམན་གྱི་ཁུར་ལྕི་བ་ཡིན།ཁོ་ཚོའི་སློབ་སྦྱོང་གི་བར་ཁྱད་ཀྱང་གཙོ་བོ་ཁོར་ཡུག་དང་འབྲེལ་ཡོད་ཀྱི་དགེ་རྒན། ཁྱིམ་བདག་དང་སློབ་གྲོགས་སོགས་ཀྱིས་རྒྱབ་སྐྱོར་བྱས་པ་མི་འདང་བ་དང་།ཁོར་ཡུག་བཟང་པོ་ཞིག་གསར་སྐྲུན་མ་བྱས་པ་སོགས་ཀྱི་རྐྱེན་ལས་བྱུང་བ་དང་།དེས་ཁོ་ཚོའི་ནུས་ཤུགས་དང་བརྩེ་སེམས་ལ་སྒུལ་ཤུགས་མེད་པར་རང་ལ་དོགས་པ་ཟ་བ་དང་།རང་གི་འཕེལ་རྒྱས་ལ་བཀག་རྐྱེན་ཆེན་པོ་ཐེབས་ངེས།དེ་བས་དགེ་རྒན་གྱིས་རྒྱུན་ལྡན་གྱི་སློབ་ཁྲིད་གོ་རིམ་ཁྲོད་སྦྱངས་འབྲས་ཞན་པའི་སློབ་མས་ལན་འདེབས་ཐུབ་པའི་འདྲི་གཞི་འདོན་པ་དང་ལན་བཏབ་པ་འགྲིག་ན་བསྟོད་བསྔགས་བྱེད་པ་བཅས་ཀྱི་ཐབས་ཤེས་སྤྱོད་དགོས།དཔེར་ན་སློབ་ཁྲིད་དངོས་ལ་མ་ཞུགས་གོང་ཁོ་ཚོ་དང་མཉམ་དུ་སློབ་ཚན་ལ་སྔོན་སྦྱོང་བྱེད་པ་དང་།དཀའ་གནད་འཚོལ་བ།གོ་རིམ་དབྱེ་ཞིབ་བྱེད་པ། སློབ་ཐུན་གྲོལ་རྗེས་དཀའ་གནད་སྐོར་ལ་གཤིབ་བསྡུར་དང་མཇུག་འབྲས་ལ་ལྟ་ཞིབ་བྱེད་པ།དུས་རྒྱུན་ཁོ་ཚོར་རྒྱུགས་མ་བླངས་པའི་སྔོན་དུ་གཙོ་གནད་སྐོར་གཤར་སྦྱོང་བྱེད་པའི་ཐབས་སྟོན་པ་བཅས་སློབ་མའི་དངོས་ཡོད་གནས་ཚུལ་ལ་དམིགས་ནས་ཟུར་ཁྲིད་དང་སློབ་སྟོན་བྱས་ན།སྦྱངས་འབྲས་ཧ་ཅང་ཞན་པའི་སློབ་མ་དག་གིས་ཀྱང་རིམ་བཞིན་ཚན་རིག་གི་སློབ་ཐབས་ཤེས་པ་དང་།སློབ་སྦྱོང་གི་འབྲས་བུའང་མུ་མཐུད་དུ་མཐོར་འདེགས་འབྱུང་སྲིད། འདི་ལྟར་དོན་དངོས་གཞིར་བཟུང་ནས་སློབ་མའི་བློ་དང་འཚམ་པའི་ཁྲིད་སྟོན་བྱས་ན།ཁོ་ཚོའི་སྤྲོ་སེམས་དང་དཔའ་གདེང་བསྐྱེད་པར་ཕན་ལ།རང་དམན་འདུ་ཤེས་དོར་ནས་ཡིད་ཆེས་བསམ་བློ་གསར་འཛུགས་དང་སློབ་སྦྱོང་ཕྱོགས་ཀྱི་རང་འགུལ་རང་བཞིན་དང་ཧུར་བརྩོན་རང་བཞིན་མཐོར་འདེགས་བྱེད་ཐུབ་པ་རེད།།
