སུ་ཞིག་གིས་ཅི་ཞིག་འཚོལ་བའམ།
བཙལ་ཡང་མ་རྙེད་པར།
དུང་མདོག་གི་ཁ་བའི་འདབ་ལོ་རུ་སྤྲུལ་ནས།
ཟང་ཟིང་གི་འཇིག་རྟེན་འདི་ལ་མེ་ཏོག་གི་དོ་ཤལ་སྤྲས་དོན་ཅི།
སུ་ཞིག་གིས་ཅི་ཞིག་སྙེགས་པའམ།
སྙེགས་ཀྱང་མ་ཐོབ་པར།
དངུལ་མདོག་གི་ཁ་བའི་གོས་དཀར་ལ་སྤྲུལ་ནས།
བདག་མེད་ཀྱི་མི་ཡུལ་འདི་ལ་རབ་དཀར་གྱི་ན་བཟའ་བཀླུབས་དོན་ཅི།
བཙལ་ཡང་བཙལ་ལ།
སྙེགས་ཀྱང་སྙེགས་པའི།
ཡིད་འོང་གི་སེམས་འགྱུ་དྲོན་མོ་དག
ཁ་བའི་མེ་ཏོག་ལ་བཅོལ་ནས།
ལྷབ་ལྷུབ་ཡིད་དགའི་མདངས་ཀྱིས་ཁྱེད་ཀྱི་མཐོང་སྣང་དུ་བབས་ན།
གདུང་སེམས་ཀྱིས་བཟི་ལ་སྐྱོ་གདུང་གིས་མནར་བའི།
ཁོ་བོའི་ཡ་ཆུང་སྙིང་གི་ཞིང་ས་རུ་དགོས་འདོད་ཀྱི་སྦྲང་ཆར་ཟིམ་ཟིམ་དུ་འབབ་སྲིད།
ཁ་བའི་མེ་ཏོག་ཡ།
དུས་ཚིགས་ཀྱི་ཁུགས་སོ་འདི་ནས།
ངས་དབྱར་གྱི་མཛེས་སྡུག་མི་གླེང་ལ་སྟོན་གྱི་གསེར་མདོག་དེ་བས་ཀྱང་གླེང་མི་སྲིད།
ངས་ཁྱེད་ཀྱི་ཁུ་སིམ་མེར་བསྐྲུན་པའི་ལྷིང་འཇགས་ཀྱི་འཇིག་རྟེན་འདིའི་བདེ་བ་ལ་ཡིད་མགུ་བྱེད་བཞིན།
སྔར་བཞིན་འཚོལ་སྙེག་གི་ལམ་བུ་གསར་བ་རེ་གཏོད་སྲིད།
