དེ་རིང་ནི་བདག་གི་སྐྱེས་སྐར་ཡིན་ཟེར།
སྨོན་ཚིག་མེད་ལ་ཁ་གཡང་མེད།
རྒུན་ཆང་མེད་ལ་སྤྲི་གོར་མེད།
གྲོགས་པོ་མེད་ལ་ཆུང་འདྲིས་ཀྱང་མེད།
ཡིན་ནའང་།
སྙན་ངག་དང་མཚན་མོ་ཡོད།
ད་དུང་། ཐ་མག་རྐང་ཅིག་སྒྲོན་ཏེ།
ངས་ཁེར་རྐྱང་གི་མུན་པ་དེ་གསལ་ཐབས་བྱས།
རོལ་དབྱངས་ཀྱི་དབུགས་རྩ་འགག་སོང་།
དགུན་དུས་ཀྱི་ཁ་བ་ཞུས་འདུག
གྲང་ཤུར་ཤུར་གྱི་ཡུལ་དང་།
འཁྱགས་སིབ་སིབ་ཀྱི་མཚན་མོ།
དྭངས་གཙང་གི་བརྩེ་བ།
ཁྱེད་ཀྱིས་གནང་བའི་ལེགས་སྐྱེས་ཡིན།
འཇིག་རྟེན་དུ་ལྟེ་ཁྲག་འཕོས་ཏེ།
རང་ཉིད་རང་གིས་ཤེས་པ་ནས་བཟུང་།
ངས་འཆི་བ་ལ་བསམ་གཞིགས་དང་།
སྟ་གོན་ཡང་ཡང་བྱས།
འདི་ནི་ནར་སོན་གྱི་བརྒྱུད་རིམ་དང་སང་ཉིན་གྱི་གདམ་གའོ།།
ཁྲ་ཆིལ་ཆིལ་དུ་འཛུམ་པའི་སྐར་ཚོགས།
སྦྲ་རོག་རོག་གི་རུ་སྡེ་ཕྲ་མོ།
དབེན་ཐིང་ཐིང་གི་རི་ལུང་ཐང་གསུམ།
དྲོད་ལམ་ལམ་གྱི་ཕ་ས་ཕ་ཡུལ།
འདི་དག་ནི་ང་ལ་ཆེས་བློ་དཀར་བའི་སྐུ་མགྲོན་དང་།
ངའི་འཇིག་རྟེན་གྱི་དྲོད་ཁོལ་ཡིན།
ཁེར་རྐྱང་གི་ཚེ་སྲོག
ན་ཟུག་གི་ལང་ཚོ།
མུན་ནག་གི་འཚོ་བ།
རབ་རིབ་ཀྱི་འབྱུང་འགྱུར།
ནག་ནོག་གི་མྱི་སེམས།
ངའི་འཇིག་རྟེན་གྱི་སྤྲི་གོར་ངོས་སུ་ལྷུག་པོར་བཞད།།
