དུང་བ་འདི་མ་ལྷོད་ན།
དུས་ཚོད་ཀྱི་འཁོར་འགྲོས་ཁྲོད་འགྲིབ་ལ་ཉེ།
འཚོ་བའི་ཁ་དོག་གསལ་ལ་མི་གསལ་བའི་ངང་ནས།
ངས་ཚོད་སྒམ་གྱི་ཁྲོད་ནས་བྱ་བ་གང་མང་བསྒྲུབ།
སྐབས་རེར།ངས་ཁྱེད་ཀྱི་འཚོ་བའི་ཁ་དོག་ཅི་འདྲ་ཞིག་ཡིན་རྟོགས་མེད་པ་འདྲ།
མང་པོ་མང་པོ་ཞིག་ལ་བསམ་བློ་བཏང་ཚེ།
ང་ནི་དངོས་གནས་ཁྱོད་ཀྱི་བྲང་གཞུང་དང་བྲལ་འདོད་མེད།
ཡིན་ན་ཡང་།གནར་གཅོད་ཀྱི་དུས་ཚོད་དྲན་ཐེངས་རེར།
སྲོག་གི་འཕར་རྩ་ཆེར་ལྡང་གི་འདུག
སུ་ལ་ཡང་ལེ་བདའ་བྱེད་ཐབས་བྲལ།
ཁྱོད་ཀྱི་འཚོ་བའི་རྣམ་ཤེས་དེ་ལ།
བདག་གི་འཚོ་བའི་ཁ་དོག་འཐིམས་བཞིན་ཡོད།
ཕྱོགས་ཡོངས་ཀྱི་སྐད་ཆ་དག་ལ།
ངས་ཡིད་ཆེས་དེ་འདྲ་ཟབ་མོ་བྱེད་འདོད་མེད།
བྲེལ་འཚུབ་ཀྱི་ངང་ནས་ཤ་ཁྲག་རུས་གསེང་ལ་བརྩེ་བ་དམར་པོ་ཞིག་ཆགས་འདུག
གལ་སྲིད།དུས་ཚོད་འདིས་ར་སྤྲོད་བྱེད་ཐུབ་ན།
འཇིག་རྟེན་འདི་དང་བྲལ་བའི་བར་དུ་ཁྱོད་འགྲམ་ནས་འདུག་འདོད།
སེམས་ཁམས།
རླུང་བུ་ནི་འུར་འུར་དུ་ལྡང་གིན་འདུག
ཤོག་ལེ་རེ་རེའི་སྒྲ་གྲགས་དུས།ང་ལ་སྐྲག་སྣང་ཞིག་མཆིས།
སྒོ་དང་སྒེའུ་ཁུང་དག་གཏད་དེ་རང་ཉིད་གཅིག་པུར་བསྡད།
འདི་ནི་ཅི་འདྲའི་བརྗོད་ཀྱིས་མི་ལང་བའི་ན་ཟུག་ཅིག་རེད།
རླུང་བུ་ལགས།
ཁྱོད་ནི་གནམ་གཤིས་དྲོ་གྲང་གི་ཁྲོད་དུ་འདུག་ལ།
ནད་གཞི་ཀུན་གྱི་ཁམས་ན་ཡང་འདུག
ཅི་འདྲིའི་གདུག་རྩུབ་ཆེ་བ་ཞིག་རེད།
ཕྱི་རོལ་གྱི་རླུང་ཁ་ན་ཟུར་ཟའི་སྐད་ཆ་ཧ་ཅང་མོད།
ངས་དེ་དག་མཐོང་ཆེན་དང་ཁ་ཡ་བྱེད་འདོད་མེད།
ཡིན་ན་ཡང་།
ཙག་རླུང་གིས་བཅོམ་པའི་བདག་གི་སེམས་ཁམས།
ནམ་ཡིན་ཡང་གླང་རྒན་བཞིན་བསྒྱུར་ཐབས་བྲལ།