ངེད་གསར་འགྱུར་གྱི་གསར་བཀོད། ཉེ་ཆར། མཛོད་དགེ་རྫོང་གིས་གཉེན་ཉེའི་བརྩེ་སེམས་ཀྱིས་རྩྭ་ཐང་གི་ཨ་མར་གཅེས་སྐྱོང་བྱེད་ཅེས་པ་དང་ཨ་མའི་སློབ་ཁང་ཞེས་པའི་སྒྲོག་འགྲེལ་བྱེད་སྒོ་དེ་དུས་ཡུན་ཉིན་9ཡི་རིང་ལ་རྫོང་ཡོངས་ཀྱི་ཡུལ་ཚོ་དང་གྲོང་རྡལ་17དུ་སྤེལ་བ་རེད།
བྱེད་སྒོའི་ལས་གཙོ་བོར་དུས་བབ་གསར་བ་དང་བུད་མེད་གསར་བས་འགན་འཁྲི་ཇི་ལྟར་འཁུར་བ་དང་། ཁྱིམ་ཚང་གི་སྤྱོད་བཟང་། སྒེར་གྱི་ཀུན་སྤྱོད། ཁྱིམ་སྲོལ་བཟང་བོ་སོགས་ཀྱི་བསམ་བློའི་སློབ་གསོ་དང་འབྲེལ་ཡོད་དམངས་ཕན་སྲིད་ཇུས་སྒྲོག་འགྲེལ་བྱས་པ་དང་། བུད་མེད་ཀྱི་ཁེ་ཕན་དང་འབྲེལ་བ་ཡོད་པའི《གཉེན་སྒྲིག་བཅའ་ཁྲིམས》དང《བུད་མེད་ཀྱི་ཐོབ་ཐང་བཅའ་ཁྲིམས》《ཕོ་མོ་འདྲ་མཉམ་གྱི་གཞི་རྩའི་རྒྱལ་ཇུས》སོགས་ཀྱི་བཅའ་ཁྲིམས་དང་ཁྲིམས་སྲོལ་དྲིལ་སྒྲོག་བྱས་པར་མ་ཟད། དུག་འགོག་དང་བུད་མེད་ཀྱི་ནད་རིགས་འགོག་བཅོས་ཀྱི་རྒྱུན་ཤེས། སྐྲན་ནད། ཐུམ་འབུའི་ནད་སོགས་རིམས་ནད་སྔོན་འགོག་གི་ཤེས་བྱ་ཁྱབ་གདལ་དུ་བཏང་།
བྱེད་སྒོར་བོད་རྒྱ་སྐད་གཉིས་ཀྱི་དྲིལ་སྒྲོག་དཔྱད་གཞི་2000ལྷག་སྤྲད་པ་དང་། མང་ཚོགས་3000ལྷག་ལ་སློབ་གསོ་ཐེབས་ཡོད་ལ། ད་དུང་འདག་རྫས་དང་ལག་ཕྱིས། འདག་ཕྱེ་སོགས་སྤྲད་དོ།།