འཁོར་བའི་ཉིན་སྲིབ་ཏུ།
འོད་སྣང་གི་ལམ་བུ་མེད་ཀྱང་།
འུར་ཟིང་དུ་ཉུལ་བའི་ནག་མོ་ཞིག་གི་ལས་དབང་།
ཡིག་འབྲུ་ཆ་ཤས་ཀྱི་གསང་དུ་ཉར་ག་ལ་ཐུབ།
ཉི་ཟླའི་བར་སྣང་དུ་།
དུས་ཚོད་ཀྱི་ཐིགས་པ་ཟགས།
སེམས་ཁྲལ་གྱིས་སྒྲོན་མེ་སྦར་བའི་ནག་མོ།
ཚེ་རབས་དུ་མས་འཚོལ་བའི་བརྗོད་སྙིང་ཡིན།
ཐོ་རེངས་སྐར་ཆེན་གྱི་མིག་ཟུང་ནང་།
སྐྱེས་པ་སུ་ཞིག་གི་གཏམ་རྒྱུད་ཀྱི་རི་མོ་བྲིས་ཡོད།
བྱ་གླག་གི་གཤོག་པ་ལྟ་བུའི་སྨིན་མའི་དཀྱིལ།
སྐྱེས་པ་སུ་ཞིག་དྲན་པ་སྦ་གསང་བྱས།
སེམས་ཀྱི་འཇིག་རྟེན་དུ་འཚོ་བའི་ནག་མོ།
སྐྱེས་པ་ཞིག་གི་མི་ཚེ་ཡི་རོལ་དབྱངས་ཡིན།
ཁྱིམ་གྱི་གཡང་རྟེན་དུ་འཁྱིལ་བའི་ནག་མོ།
བུ་ཕྲུག་ཅིག་གི་ཚེ་སྲོག་གི་སྐྱབས་མགོན་ཡིན།
སྡུག་བསྔལ་གྱི་སྤྲིན་ནག་གིས་འོད་ཟེར་སྒྲིབ་ཀྱང་།
སུན་སྣང་དང་ངལ་དུབ་མེད་པའི་ནམ་མཁར།
འབད་བརྩོན་གྱི་མཚོ་མོ་བསྐྱིལ་བཞིན།
སང་ཉིན་གྱི་འོད་སྣང་ལ་སྙེགས་འགྲོ།