གུ་དོག་པའི་བསམ་བློའི་འཆིང་རྒྱ་ལས་གྲོལ་ཆེད།
མཚན་གཞུང་འདིར་མཁའ་ལ་ཟླ་བ་ཚེས་མེད་ཀྱང་།
སྨག་ནག་པའི་ལྷ་ལམ་ལ་མིག་ཟུང་ཅེར་བར་ཐལ།
ད་ནི། སེམས་པ་འདི་ལྷོད་ཤིག་ཤིག་ཏུ་གྱུར་བའམ་ཅི།
ལུས་པོ་འདི་བདེ་སང་སང་བྱས་བྱུང་།
འཚོ་བའི་རྙོག་འཛིང་ཡོད་ཚད་ས་རུ་འཐིབ་དུས།
བདག་ནི་གཤོག་རྩལ་བྱ་ལ་གཡར་ནས།
ཞི་འཇགས་ཀྱི་མཁའ་ལ་འཕུར་འདོད་ཅི་འདྲའི་ཆེ་ཨང་།
ཁྱེད་ཉིད་ལ།
ངོ་མ་ལེ་ཁག་མི་འདུག
འཆམ་མཐུན་དང་ལྷིང་འཇགས་ནི་ང་ཚོའི་རེ་བ་ཡིན་པས།
ཁྱེད་ཀྱང་གཤོག་རྩལ་བྱ་ལ་གཡར་ནས་འཕུར་བར་རྒྱུ་མཚན་ཆེ།
ལྷིང་འཇགས་ཀྱི་དོ་ནུབ་ལ།
ཅི་ཞིག་མོལ་བཞིན་གཟུགས་དང་གྲིབ་མ་ལྟ་བུའི་མཛའ་གཅུགས་ཟུང་།
བདག་གི་མིག་ལམ་ནས་རྒྱང་ནས་རྒྱང་དུ་བཞུད་བཞིན།
བཞུད་ཀྱིན་དུ་བདག་ལ་རྣམ་རྟོག་ཅི་ཡང་སྦྱིན་བྱུང་སྟེ།
ཡང་སྙིང་ཁོ་ཚོའི་འཚོ་བ་དེ་ཞི་བདེ་ཡིན་ནམ།
ཁོ་ཚོའི་སེམས་པ་དེ་ལྷིང་འཇགས་ཡིན་ནམ།
གང་ལྟར།ཁོ་ཚོས་བདག་གི་སེམས་པ་དཀྲུགས་སོང་།
སེམས་པ་དཀྲུགས་དཀྲུགས་པའི་མཐར།
སྙན་ངག་འདི་སུ་ཞིག་གི་དོན་དུ་འབྲི་བའང་བརྗེད་ལ་ཁད།
ད་ནི།ཨ་མ་ཆང་མ་ལགས་ཀྱིས་བསྙལ་བའི་མཆོད་ཆང་འདི།
སྨན་ཆུང་བུ་མོས་བཀྱག་པ་མིན་ཡང་འཐུང་རྐྱང་ཡིན་ལ།
སེམས་པ་མཚོན་པའི་མཛའ་གཞས་འདི།
ཁྱེད་ཀྱིས་བྲིས་པ་མིན་ཡང་ལེན་རྐྱང་ཡིན།
དེ་བས།
ཟླ་འོད་བྲལ་བའི་མཚན་མོ་འདི།
མཛེས་པས་སྟོངས་ཀྱང་སྙན་ཚིག་འབུལ་རྐྱང་ཡིན།
གཅིག་བྱས་ན་ར་བཟི་རྗེས།
བདག་ལ་གུ་ཡངས་ཤིག་ཅིས་ཀྱང་འཐོབ་སྲིད།
