ང་ཡི་སྒེའུ་ཁུང་འཁྲིས་སུ་ལོ་མ་འཐོར།།
ལོ་མར་བརྩེ་འཕྲིན་བྲིས་ནས་རླུང་ལ་སྤུར།།
ང་དང་ཆུང་འདྲིས་གཉིས་ཀྱི་སྙིང་གཏམ་ནི།།
ལོ་མ་ཁྱོད་ལས་གཞན་གྱིས་ཤེས་ནས་མེད།།
མཚན་གྱི་སྐར་མ་སྨིན་དྲུག་འོད་རླབས་ནི།།
བདག་གི་གྲུ་བཞིའི་སྒེའུ་ཁུང་ངོས་ལ་འཕོག།
ཚོར་བའི་སེམས་ཀྱི་གླུ་ཆུང་གང་ལ་ལེན།།
སྟོན་གྱི་ནམ་ཟླའི་ཁྲོད་ནས་ག་ལེར་གྱེར།།
ཟླ་བའི་ལང་ཚོ་གཙང་བོའི་འགྲམ་དུ་འཕྲོ།།
དྭངས་གསལ་ཆུ་བོའི་རླབས་སུ་ཡང་ཡང་འཚེར།།
བདག་གིས་ཚོར་བའི་རྒུན་ཆང་མང་དུ་བཏུང་།།
སྟོན་ཁའི་གཞུག་ནས་ཚོར་བས་སྣང་བ་རྡུང་།།
ཡུལ་མི་རྣམས་ཀྱིས་སྟོན་ལོ་བསྡུ་བར་བྲེལ།།
ན་ཆུང་བུ་མོའི་རྔུལ་ཆུས་སྐྲ་གསེབ་བརླན།།
སྣང་བ་གར་ལ་གཡེང་བཞིན་གླུ་དབྱངས་ལེན།།
གཤིས་བཟང་བུ་མོའི་རྣམ་པ་སྟོན་མཇུག་མཐོང་།།
ཡིད་འོང་སྟོན་མཇུག་ལོ་མར་སྙན་ངག་བྲིས།།
ཨ་སྔོན་དབྱིངས་ཀྱི་སྤྲིན་དཀར་ཁྱོད་ལ་བསྐུར།།
ན་བུན་སྨུག་པའི་གསེབ་ནས་སྤྲིན་དཀར་ཆས།།
སྤྲིན་པ་དཀར་ཆུང་རྒྱང་རིང་མཚམས་ནས་བཞུད།།
ཕར་རིའི་སྤང་ཐང་སྔོ་ལྗང་ཁ་དོག་ཡས།།
འགྲམ་གྱི་སྡོང་ལོ་སེར་ཆེན་སྐྱ་བོར་གྱུར།།
སྟོན་མཇུག་སྣང་བ་རྩེན་པའི་ཚོར་བ་ཡིས།།
སྙན་ངག་འབྲི་ལ་འཛད་མཐའ་མི་འདུག་གོ།
ཁེར་རྐྱང་སྐྱོ་བས་མནར་དུས་ཆང་རག་འཐུང་།།
དེས་ཀྱང་མི་ཕན་སྐྱོ་བའི་སྙན་ངག་དག།
མང་དུ་འབྲི་བར་མོས་པའི་ཚོར་བ་ནི།།
སྐོམ་པ་ཆུ་ལ་འཕྲད་ལྟར་འདོད་པས་མྱོས།།
