མིག་ལ་ཆུ་འཁོར་ཆུ་ལ་འགྲམ་དར་ཆགས།།
ཆགས་ཀྱང་ལོས་ཆགས་ཡིད་ལ་ཁ་བ་བབས།།
ལོ་ཟླའི་གསེབ་ཏུ་སྐྱོ་བའི་གཞས་ཡང་གཏོང་།།
དེ་ཡང་ལོས་ཡིན་འཚོ་བར་ཁ་མདོག་ཟད།།
ཡིད་ཀྱི་ངོས་ལ་དྭངས་པའི་མཚོ་མོ་འཁྱིལ།།
ཁེར་རྐྱང་མཚོ་ལ་འཐིམ་པའི་མི་ཡང་སླེབས།།
གནམ་གྱི་མཐའ་རུ་དྲན་པའི་མི་ཡང་ཐོན།།
དྲན་པའི་མི་ལ་བཅོས་མའི་འཛུམ་ཀྱང་བསྟན།།
སྔོན་མོ་གནམ་གྱི་རྒྱ་ཁྱོན་གཞལ་དུ་མེད།།
བདེན་ཀྱང་ལོས་བདེན་ནམ་མཁར་མཐའ་ཡང་མེད།།
མི་དང་སེམས་ཀྱི་བར་ཐག་དེ་བས་རིང་།།
རིང་ཡང་ལོས་རིང་གྲང་བའི་རླུང་ཡང་རྒྱུ།།
འདྲེས་པའི་གྲོགས་ལ་དཀར་པོ་བློ་ཡང་གཏད།།
མ་འདྲེས་མི་ལ་བདེ་མོའི་ཚིག་ཡང་ཞུས།།
འཆུག་པ་འདི་དང་དེའོ་ཟེར་མཁས་མོད།།
རང་ཉིད་བཅོས་མཁས་སྲིད་ན་དཀོན་ཚོད་འདུག།
ཁ་བ་ཉིན་ལ་མ་བབས་མཚན་ལ་བབས།།
མཚན་མོའི་མུན་ནག་གསེབ་ཏུ་ག་ལེར་བབས།།
ཁ་བ་མཚན་ལ་མ་ཞུ་ཉིན་ལ་ཞུ།།
ཉིན་མོར་ས་གཞིའི་ཁུད་དུ་མིག་ཆུར་ཞུ།།
