མིག་གིས་མ་ཁེབས་པའི་ཕྱི་རོལ་གྱི་མཛེས་པ་དག
སྔ་ཕྱིའི་གོ་རིམ་ལྟར་དུས་ཚོད་ཀྱི་ཁ་ཟས་སུ་གྱུར།
དབང་ཤེས་ཀྱི་སྤྱོད་ཡུལ་དུ་གྱུར་བའི་འཇིག་རྟེན་ལ་རྒས་གཉེར་ལྷུང་དུས།
དྲོད་གཤེར་ལས་སྐྱེས་པའི་འབུ་སྲིན་གྱི་རིགས།
རེ་རེ་བཞིན་འཆི་ལམ་དུ་སྙེག་པར་བྱེད།
དེ་དུས། ལམ་འགྲམ་གྱི་མེ་ཏོག་དག་ལ་ཡིད་འཁྲེང་མཁན་ཡོད་དམ།
གསེར་གྱི་ཁུ་བ་བྱུགས་འདྲའི་སྟོན་ཁ།
སྡོང་མགོའི་ལོ་མ་དག་གིས་སྲང་ལམ་ཉུལ།
མི་ཚོགས་ཀྱི་སེམས་ཁོང་དུ་སྐྱོ་སྣང་གི་གླུ་གཞས་འཐེན།
ཁེར་རྐྱང་དུ་ལུས་པའི་ཡལ་ག
གཉོམ་ཆུང་གིས་ཡང་ཡང་གཡོ་ཞིང་འགུལ།
ཁེར་རྐྱང་གི་ལྷིང་འཇགས་དཀྲོགས་པའི་སྟོན་རླུང་།
ང་རྒྱལ་དང་ཞེ་སྡང་གིས་བཏེགས་ཏེ།
མི་ཚོགས་ཀྱི་སེམས་པ་འདར་ཞིང་སྐྱོམ།
ཁུར་གྱིས་དུད་པའི་རི་རབ་ཀྱི་སྐྲ་ལོའང་།
ཁུ་སིམ་པོས་འདར་སིག་སིག་ཏུ་གྱུར།
སྟོན་མཇུག་གི་མཚན་མོ་འདིར།
ནམ་མཁའ་སྔོ་ཞིང་དྭངས་པས་ཟླ་བ་ཕྱི་གསལ་ནང་གསལ་དུ་གྱུར།
ཟླ་བའི་ངོ་གདོང་ལ་ནན་གྱིས་བལྟས་ན།
གནའ་སྔ་མོར་ཨ་མས་ང་ལ་འཆད་མྱོང་བའི།
བྱིས་པ་དང་རི་བོང་གི་གཏམ་རྒྱུད་ཅིག་ལ་ཕྱིར་དྲན་འཁོར།
