འོག་མིན་ལྷ་ཆེན་གྱི་རྩེད་ར་མིན་ཡང་།།
ཉམས་དགའ་ཡིད་འོང་གི་མཛེས་འཛུམ་མེ་ཏོག།
མཚན་མོའི་སྐར་ཚོགས་ཀྱི་གྲངས་དང་མཉམ་པ།།
ཚངས་པའི་སྤྲིན་དཀར་གྱི་སེམས་པ་ཕྱོགས་འདུག།
ལྗོན་ཤིང་ཡལ་ག་ཡིས་མགོ་ལྕོག་ལྡེམ་མེ།།
དྲི་ཞིམ་ཆར་ཆུ་ཡི་ཀློང་དུ་མཆིས་ནས།།
ཁུ་བྱུག་སྙན་འགྱུར་དང་སྦྲང་ཆུང་མགྲིན་པ།།
དབྱངས་ཅན་ལྷ་མོ་ཡི་གསུང་དང་འགྲན་ཟེར།།
འཇའ་ཚོན་སྣ་ལྔ་ལ་རི་མོ་གཡར་ནས།།
འབྲོག་གི་བུ་མོ་ཡིས་གདན་ལ་བཏང་སྟེ།།
གཡང་དཀར་འབའ་སྒྲ་དང་འབྲི་མོའི་ངུར་སྒྲས།།
རྡེའུ་དཀར་ནག་གིས་འཚོ་བ་སྐྱེལ་བསམ།།
མཚོ་ཆེན་ཁྲི་ཤོར་གྱི་ནམ་མཁའི་དཀྱིལ་ན།།
ངང་བ་རྐེ་སེར་གྱིས་ངང་ཕྲུག་ཁྲིད་དེ།།
བརྩེ་བའི་ཁྲུས་གསོལ་དང་བདུད་རྩི་བགྲང་བཞིན།།
བསིལ་འཇམ་རླུང་བུ་ཡི་ལྷིང་འཇགས་སྙེག་འདོད།།
སྡེ་ཆེན་སྡེ་ཆུང་གི་ནོར་གནག་རྗེས་སུ།།
ཕར་མཐུན་ཚུར་མཐུན་གྱི་མགུར་མོའི་གསེང་ན།།
གསང་བའི་མར་ཁུ་ཡི་མཚོ་མོ་འཁྱིལ་ཏེ།།
ལས་ཀྱི་མེ་ཏོག་གིས་དངོས་གྲུབ་སྩོལ་འདུག།
